“Daryo”ning iPhone uchun dasturi chiqarildi

“Daryo” nashrining iOS qurilmalari uchun dasturini 1-maydan boshlab Apple'ning mobil dasturlar do‘koni — App Store'dan yuklab olish mumkin.

Dastur iPhone yoki iPod touch qurilmalarida, iOS operatsion tizimining 5-versiyasi va undan yangilariga mo‘ljallangan. Kunning eng dolzarb mavzusi dastur foydalanuvchilariga push-bildirishnoma orqali yuboriladi.

“‘Daryo’ning mobil dasturlarini yaratishdan maqsad mushtariylar uchun xabarlarni o‘qishda qulaylik yaratishdir”, — deydi loyiha bosh muharriri Alisher Azimov. “Saytimiz mushtariylarining 60 foizi mobil telefon orqali tashrif buyurishini inobatga olsak, mobil dasturlarni ishlab chiqishimiz — tabiiy hol”, — deya qo‘shimcha qildi loyiha rahbari Farhod Fayzullayev.

Eslatib o‘tamiz, mart oyida “Daryo”ning Android-smartfonlar uchun dasturi taqdim etilgan edi. Bir oydan ortiq vaqt oralig‘ida dastur 6500 marta yuklab olindi va Play Store'da 246 kishi uni a’lo baholadi.

Yandex.Metrika statistikasiga ko‘ra, “Daryo”ning Android-dasturidan haftasiga deyarli 5 000 (unikal) kishi foydalanadi va ular hafta davomida 42 000 marta dasturni ishlatdi.

Google Analytics hisoblagichiga ko‘ra, so‘nggi 30 kun ichida “Daryo”ning veb-versiyasiga deyarli 530 ming mehmon tashrif buyurgan va 2,1 milliondan ortiq sahifani “varaqlagan”. Mushtariy tashrifi chog‘ida 6 daqiqa ichida 4 ta sahifaga kirgan.

Marhamat, “Daryo”ning Android va iOS uchun dasturlarini yuklab oling:

• Android uchun “Daryo” dasturi
• iPhone uchun “Daryo” dasturi