29-aprel kuni Toshkent Axborot texnologiyalari universiteti Urganch filialida O‘zLiDeP Siyosiy Kengashi Ijroiya qo‘mitasi va Xorazm viloyat Kengashi tomonidan “Innovatsiya sohasida yoshlar bilan ishlash — tadbirkorlarga ijtimoiy buyurtma” mavzusida amaliy muloqot o‘tkazildi. Bu haqda O‘zLiDeP matbuot xizmati xabar berdi.
Unda Oliy Majlis Qonunchilik palatasidagi O‘zLiDeP fraksiyasi a’zolari, partiya Siyosiy Kengashi Ijroiya qo‘mitasi hamda viloyat Kengashi xodimlari, TATU Urganch filialining professor-o‘qituvchilari, talabalari va OAV vakillari ishtirok etdi.
Tadbirdan ko‘zlangan asosiy maqsad innovatsion axborot kommunikatsiya texnologiyalarini rivojlantirish jarayonida tadbirkorlar va ixtisoslashtirilgan o‘quv yurtlari bitiruvchilarining faol ishtirokini ta’minlash, yosh ishbilarmonlarni internet-tadbirkorlikka, uning imkoniyatlaridan foydalangan holda mahsulotlarni eksportga chiqarish yo‘llarini topishga, ijobiy kontentli saytlar yaratishga o‘qitishdan iborat bo‘ldi.
Ta’kidlash lozimki, partiyaning “Yoshlar qanoti” tomonidan o‘tkazilayotgan loyihalar natijasida partiya atrofida birlashayotgan yoshlarning soni yildan yilga oshib bormoqda. Xususan, partiya viloyat kengashining 11 ming 474 nafar a’zosi bo‘lsa, shundan 50 foizni yoshlar tashkil etadi. Shu bois ham amaliy muloqotda Xorazm viloyatidagi barcha oliy o‘quv yurtlarining iqtidorli talabalari ishtirok etdi.
Izoh (0)