Velosportdan davo topgan ayol “Kasaba-tur” velomarafonida g‘olib bo‘ldi
O‘zbekiston kasaba uyushmalari federatsiyasi kengashi tomonidan tashkil etilgan “Kasaba-tur” velomarafonining Xorazm viloyati bosqichida 35—45 yoshli ayollar o‘rtasida Salima Shomurodova birinchi o‘ringa sazovor bo‘ldi.
O‘zAning ma’lum qilishicha, Xorazm viloyati Yangibozor tumanida istiqomat qiluvchi Shomurodovani qo‘l va oyoq mushaklari hamda bel og‘rig‘i tez-tez bezovta qilgani uchun shifokorlar unga velosiped haydashni tavsiya qilgan. – Ushbu musobaqalarda bir necha yildan buyon muntazam qatnashib kelaman, – deydi S. Shomurodova. – Velosport bilan shug‘ullanayotganimdan beri og‘riqlar ketib, sog‘lig‘im yaxshilandi. Shuningdek, musobaqada urganchlik Nigora Xudoyberganova 25—35 yoshli xotin-qizlar orasida marraga birinchi keldi. 230 nafardan ziyod havaskor velosportchi ishtirok etgan musobaqaning erkaklar o‘rtasida kechgan bellashuvlarida xivalik Muhammad Ibrohimov, gurlanlik Mahmud Qo‘shjonov o‘z yosh toifasi bo‘yicha g‘oliblikni qo‘lga kiritdi. “Eng mahoratli poygachi”, “Eng keksa ishtirokchi”, “Eng yosh qatnashchi”, “G‘alabaga bo‘lgan intilishi uchun” kabi nominatsiyalar bo‘yicha ham g‘olib va sovrindorlar aniqlanib, tashkilotchilar tomonidan munosib rag‘batlantirildi.
