Bolgariya poytaxti Sofiya shahrida davom etayotgan boks bo‘yicha yoshlar o‘rtasidagi jahon chempionatida bugun, 21-aprel kuni chorak final janglari o‘tkaziladi va kamida bronza medal sohiblari aniqlanadi. Bu bosqichga 10 nafar o‘zbek charm qo‘lqop ustalarining teng yarmi yetib keldi. Bu haqda “Olamsport” sayti xabar berdi.
75 kg vazn toifasidagi Kozimbek Mardonov bugun yarim final yo‘lida finlyandiyalik Kalle Kallioinenga qarshi ringga ko‘tariladi. Kecha Kozimbek tojikistonlik Mehrubon Sanginovni 3:0 hisobida mag‘lub etdi.
49 kg vaznda o‘z imkoniyatini sinovdan o‘tkazayotgan Sulaymon Latipov chorak finalda turkiyalik Mert Karaklik bilan bahslashadi. Latipov kecha makedoniyalik Lulian Ivanovni 3:0 hisobida mag‘lubiyatga uchratgan edi.
69 kg vazn toifasidagi Bektemir Meliqo‘ziyev chorak finalda ukrainalik Oleksi Tokarchuk bilan bellashadi. Ta’kidlash joiz, Bektemir nimchorak final jangida gruziyalik Giorgi Xarabadzeni yaqqol ustunlik (3:0) bilan yenggan edi.
81 kg vazndagi Obidjon Tohirovning chorak finaldagi raqibi esa ring egasi Blagoy Naydenov bo‘ladi. Tohirov kecha makedoniyalik Dmitri Brinzadan 3:0 hisobida ustun keldi.
Nihoyat, so‘nggi O‘zbekiston terma jamoasi vakili – 60 kilogrammdagi Iqboljon Xoldorov bugun chorak finalda meksikalik Villyam Siguraga qarshi ringga ko‘tariladi. Kecha u armanistonlik Jora Xamazaryanni 3:0 hisobida dog‘da qoldirgan edi.
Izoh (0)