Yo‘qolgan “Boing” qidiruvi olib borilayotgan hududda moy dog‘lari topildi
Malayziyaning yo‘qolgan “Boing”ini izlash ishlari olib borilayotgan Hind okeani hududida moy dog‘lari topildi, deya xabar bermoqda Agence France-Presse axborot agentligi ma’lumotiga tayanib “Kun” nashri. Biroq qarorgohi Avstraliyada bo‘lgan Qidiruv ishlarini muvofiqlashtirish markazi rahbari Angus Hyustonning 14-aprel, dushanba kuni aytgan so‘zlariga ko‘ra, dog‘larning qayerdan paydo bo‘lganini hali aniqlash lozim.
— Avstraliyaning Ocean Shield qidiruv-qutqaruv kemasi moy dog‘larini kecha kechasi topdi. Mutaxassislar tahlil uchun yoqilg‘idan namuna olishdi. Ushbu dog‘lar qayerdan kelib qolganini aniqlashimiz uchun bizga biroz vaqt kerak, – deya qayd etdi Hyuston Avstraliyaning Pert shahrida bo‘lib o‘tgan matbuot anjumanida.
Uning ma’lum qilishicha, katta ehtimol bilan yo‘qolgan samolyotga tegishli bo‘lgan “qora qutilar” ketma-ket olti kundan beri biror signal bermayapti. Shuning uchun 14-aprel, dushanba oqshomidan qidiruv ishlariga alohida ishlaydigan Bluefin-21 suvosti qurilmasi jalb qilinadi va u layner parchalarini izlash bilan shug‘ullanadi. Hyustonning qayd etishicha, qidiruvning suv ostidagi qismi bir necha kun davom etadi.
Eslatib o‘tamiz, Kuala-Lumpur–Pekin yo‘nalishi bo‘ylab MH370 reysini amalga oshirayotgan Malaysia Airlines aviakompaniyasining Boeing 777-200 samolyoti 8-martga o‘tar kechasi radarlardan yo‘qolgan edi. Samolyot bortida 239 kishi bo‘lgan.
