Bugun, 14-aprel kuni Bolgariya poytaxti Sofiya shahrida boks bo‘yicha 1996—1997-yillarda tavallud topgan yoshlar o‘rtasida jahon chempionati bahslari boshlanadi. Bu haqda O‘zbekiston Milliy Olimpiya qo‘mitasi matbuot xizmati xabar berdi.
Bu yilgi jahon chempionatida dunyoning 105 davlatidan kelgan 606 nafar (506 nafar o‘g‘il bola – 100 nafar qiz) bokschi 13 vazn (10 ta vaznda o‘g‘il bolalar – 3 ta vaznda qizlar) toifasida g‘oliblik uchun ringga ko‘tariladi.
Mazkur jahon chempionatida dunyoning bugungi kundagi yetakchi sportchilari aniqlanishi bilan birga, 2014-yilning 16—28-avgust kunlari Xitoyning Nankin shahrida o‘tkaziladigan II yozgi o‘smirlar Olimpiya o‘yinlarining yo‘llanmalari ham o‘ynaladi. O‘g‘il bolalar o‘rtasida har bir vaznda 1—5-o‘rinlarni, qizlar musobaqasida esa 1—4-o‘rinlarni egallagan sportchilar “Nankin—2014” o‘yinlarining yo‘llanmalariga ega bo‘ladi.
AIBA qoidasiga ko‘ra, har bir terma jamoa ko‘pi bilan uchtadan litsenziyaga ega bo‘lishi mumkin. Agarda biror-bir terma jamoada yo‘llanmalarni qo‘lga kiritgan sportchilar soni uchtadan ortib ketsa, u holda AIBA yoki Milliy federatsiya tomonidan Nankinga yo‘l oladigan uch nafar bokschi nomi e’lon qilinadi.
Eslatib o‘tamiz, mazkur jahon chempionatida O‘zbekiston sharafini Sulaymon Latipov (-49 kg), Abdulxay Sharahmatov (-52 kg), Shukurjon Rahimov (-56 kg), Iqboljon Xoldorov (-60 kg), Mahmud G‘oipov (-64 kg), Bektemir Meliqo‘ziyev (-69 kg), Kozimbek Mardonov (-75 kg), Obidjon Tohirov (-81 kg), Raxmatullo G’ofurov (-91 kg) va Shohruxbek Erkinov (+91) himoya qiladi.
Bugun o‘tkaziladigan birinchi kungi bahslarda hamyurtlarimizdan faqatgina Sulaymon Latipov ringga ko‘tariladi. Bokschi dastlabki bosqichda turkmanistonlik Bayramxon Permanovga qarshi ringga ko‘tariladi.
Ma’lumot uchun: Yoshlar o‘rtasida jahon chempionati bahslari har ikki yilda o‘tkaziladi. 2012-yili Yerevan shahri (Armaniston)da bo‘lib o‘tgan dunyo birinchiligida o‘zbekistonlik Akmalbek Qosimov (-69 kg) barcha raqiblari ustidan g‘alaba qozonib, oltin medalga sazovor bo‘lgan bo‘lsa, Murodjon Ahmadaliyev (-49 kg) finalga qadar kechgan janglarni mag‘lubiyatsiz o‘tkazib, kumush medal sovrindori bo‘lgan.
Izoh (0)