Amazon iyunda o‘zining 3D-ekranli smartfonini taqdim etadi
Jahondagi eng yirik internet-do‘kon bo‘lmish Amazon kompaniyasi shu yilning ikkinchi yarmida 3D-ekranli smartfonini bozorga chiqarmoqchi. Bu haqda Wall Street Journal nashri ma’lum qiladi, deb yozadi “ITAR-TASS”.
Nashrning ta’kidlashicha, bundan bir necha hafta avval Amazon o‘z qurilmasini San-Fransisko hamda kompaniya shtab-kvartirasi joylashgan Sietl shaharlaridagi dasturiy ta’minot ishlab chiqaruvchilarga ko‘rsatgan. Smartfonning rasmiy taqdimoti iyunda bo‘lib o‘tadi, bozorga esa u sentabr oyining oxirlarida chiqariladi. Bu AQShda Rojdestvoga bag‘ishlab narxlar pasaytirilishi mavsumining boshlanishi arafasiga to‘g‘ri keladi.
Amazon smartfonining ekrani uch o‘lchamli tasvirlar (3D) texnologiyasiga moslangan bo‘ladi; biroq foydalanuvchilarga uni ko‘rish uchun maxsus ko‘zoynak shart bo‘lmaydi. “Qurilmaning old kamerasi ko‘zlarning harakatini kuzatish funksiyasini qo‘llab-quvvatlaydigan bo‘ladi. Buning natijasida smartfondagi tasvirlar xuddi gologrammaga o‘xshab ko‘rinadi va uch o‘lchamlidek tuyiladi”, – deb yozadi Wall Street Journal nashri.
Keyingi yillarda Amazon mobil kompyuter qurilmalari bozoriga chiqishga jiddiy harakat qilmoqda. Internetda mahsulotlar va xizmatlar bozorini tashkil etishdan tashqari, hozirda Amazon elektron kitoblarni o‘qishga mo‘ljallangan Kindle qurilmasi hamda Kindle Fire planshetini ishlab chiqaradi.
