O‘zbekiston Senati Konstitutsiyaga o‘zgartishlar kiritish to‘g‘risidagi qonunni ko‘rib chiqadi

10-aprel kuni Toshkent shahrida O‘zbekiston Respublikasi Oliy Majlisi Senatining o‘n to‘rtinchi yalpi majlisi ochiladi, deb xabar bermoqda O‘zA.

9-aprel kuni Oliy Majlis Senati Kengashining majlisi bo‘lib o‘tdi. Majlisda ishchi guruh rahbarining bo‘lajak yalpi majlisni o‘tkazishga tayyorgarlik to‘g‘risidagi axboroti tinglandi.

Senat qo‘mitalarining raislari qo‘mitalarning majlislari o‘tkazilganligi hamda 14-yalpi majlis muhokamasiga kiritilgan qonunlar yuzasidan xulosalar va boshqa masalalar bo‘yicha qarorlarning loyihalari tayyorligi haqida axborot berdilar, yalpi majlis ishini tashkil etish to‘g‘risida fikr almashdilar.

Kengash majlisida Oliy Majlis Senatining bo‘lajak yalpi majlisida muhim masalalardan biri O‘zbekiston Respublikasi Prezidenti tomonidan qonunchilik tashabbusi tartibida parlament muhokamasiga kiritilgan “O‘zbekiston Respublikasi Konstitutsiyasining ayrim moddalariga o‘zgartish va qo‘shimchalar kiritish to‘g‘risida (32-, 78-, 93-, 98-, 103- va 117-moddalariga)”gi O‘zbekiston Respublikasi qonunini ko‘rib chiqishdan iborat bo‘lishi qayd etildi.

Senatning yalpi majlisida “O‘zbekiston Respublikasi Konstitutsiyasining ayrim moddalariga o‘zgartish va qo‘shimchalar kiritish to‘g‘risida (32-, 78-, 93-, 98-, 103- va 117-moddalariga)”gi O‘zbekiston Respublikasining qonuni qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish haqida”gi qonunni ham ko‘rib chiqish rejalashtirilmoqda.

Kengash a’zolari O‘zbekistonda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasini amalga oshirish doirasida ishlab chiqilib, Senatning yalpi majlisi muhokamasiga kiritilayotgan, siyosiy va ijtimoiy-iqtisodiy hayotning hamma sohalarini izchil isloh qilish va liberallashtirishga qaratilgan O‘zbekiston Respublikasi qonunlarining muhimligini ham ko‘rsatib o‘tdi.

Bular jumlasiga “Davlat hokimiyati va boshqaruvi organlari faoliyatining ochiqligi to‘g‘risida”gi, “Aksiyadorlik jamiyatlari va aksiyadorlarning huquqlarini himoya qilish to‘g‘risida”gi (yangi tahrirda), “Huquqbuzarliklar profilaktikasi to‘g‘risida”gi, Sudyalarning malaka hay’atlari to‘g‘risidagi nizomni (yangi tahrirda) tasdiqlash haqidagi, “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish, shuningdek, ayrim qonun hujjatlarini o‘z kuchini yo‘qotgan deb topish to‘g‘risida”gi O‘zbekiston Respublikasi qonunlari kiradi.

Yalpi majlisda Oliy Majlis Senatining, Oliy Majlis Inson huquqlari bo‘yicha vakilining (ombudsmanning) 2013-yildagi faoliyati to‘g‘risidagi masalalar, Hisob palatasining, O‘zbekiston Respublikasi Tabiatni muhofaza qilish davlat qo‘mitasining 2013-yildagi faoliyati to‘g‘risidagi hisobotlari, shuningdek, O‘zbekiston Respublikasi adliya vazirining 2013-yilda davlat boshqaruvi organlari, mahalliy davlat hokimiyati organlari, huquqni muhofaza qiluvchi va nazorat qiluvchi organlar faoliyatidagi qonuniylikning holati to‘g‘risidagi axboroti ko‘rib chiqiladi.

Majlisda O‘zbekiston Respublikasi Oliy Majlisi Senati Kengashining vakolatlariga kiruvchi boshqa masalalar ham ko‘rib chiqildi. Muhokama qilingan barcha masalalar yuzasidan O‘zbekiston Respublikasi Oliy Majlisi Senati Kengashining tegishli qarorlari qabul qilindi.