Rossiyaning “Gazprom” kompaniyasi Qirg‘izistonning “Qirg‘izgaz” kompaniyasini 1 dollar evaziga sotib olish to‘g‘risida shartnoma imzoladi, deya xabar bermoqda “RIA Novosti” axborot agentligi.
— Bu tarixiy voqea. Bugun “Qirg‘izgaz” OAJning 100 foiz aksiyalarini “Gazprom”ga sotish to‘g‘risidagi shartnoma imzolandi. “Qirg‘izgaz” bizning katta oilamiz a’zosiga aylandi. Yangi korxona endi “Gazprom-Qirg‘iziston” deb ataladi, — dedi “Gazprom” rahbari Aleksey Miller.
Qirg‘iziston aholisi va sanoatini gaz bilan uzluksiz ta’minlash yangi korxona oldidagi eng asosiy vazifa hisoblanadi, deya xabar bermoqda “Gazeta.ru”.
“Kun”ning ma’lumotlariga ko‘ra, Qirg‘iziston parlamenti 2013-yil iyulida Moskvada imzolangan kelishuvni o‘tgan yil dekabrida ma’qullagan. Kelishuvga asosan, “Qirg‘izgaz”ning barcha mulki, jumladan, gaz quvurlari, gaz taqsimlash stansiyalari va yerosti saqlash inshootlari ramziy baho – 1 dollar evaziga “Gazprom”ga beriladi.
Shuningdek, “Qirg‘izgaz”ning 40 million dollardan kam bo‘lmagan barcha qarz majburiyatlari ham Rossiya tomoni ixtiyoriga o‘tadi.
Izoh (0)