Android tizimli qurilmalar uchun ishlab chiqarilgan, reytinglarda birinchi o‘ringa chiqib olgan Virus Shield pulli dasturi befoyda ekanligi aniqlandi. Bu to‘g‘rida Android Police xabariga tayanib TJournal nashri ma’lumot bermoqda.
Google Play dasturlar do‘koniga Virus Shield joriy yilning mart oyi oxirlarida qo‘yilgan bo‘lsa-da, oxirgi haftada uni 10 mingdan ziyod foydalanuvchilar sotib olishgan. Google bu borada aniq raqamni ko‘rsatmasdan, dasturni o‘rnatishlar soni 10–50 ming orasida ekanligini ko‘rsatadi. Shu tariqa, antivirus Google Play’ning “yangi pulli dasturlar” toifasidagi barcha vaqtlardagi dasturlar reytingida uchinchi o‘ringa chiqib oldi.
3,99 dollar turadigan Virus Shield tavsifida ko‘rsatilishicha, u smartfonga zarar keltiruvchi dasturlar o‘rnatilishining oldini oladi, real vaqt rejimida fayllarni va sozlamalarni tekshiradi, shuningdek, “shaxsiy ma’lumotni himoyalaydi”. Antivirusning reytingi besh balli tizimda 4,7 ball olib, yuqori ko‘rsatkichni namoyon etgan.
Android Police ta’kidlashicha, aslida dastur yuqorida ko‘rsatilgan vazifalarning birontasini ham bajarmaydi. “Antivirus”ning kodi ochib tekshirib ko‘rilganida aniqlanishicha, dastur bittagina ish bajargan: ekrandagi “tekshirilmagan” belgisini “tekshirilgan” belgisiga almashtirib qo‘ygan.
Android Police xulosasini dasturning tarkibini o‘rganib chiqqan boshqa mutaxassislar ham tasdiqlashgan.
Android Police qalbaki antivirusning ishlab chiqaruvchisi – Deviant Solutions haqida ma’lumot topa olmadi. Ma’lum bo‘lgan yagona holat – firibgarlik qilishga uringanligi uchun uni Sythe.org forumida bloklab qo‘yishgan.
Virus Shield haqida Android Police shu ma’lumotlarni chiqarganidan bir necha soat o‘tib, bu “puch” dastur Google Play do‘konidan o‘chirib tashlangan. Ammo uning sahifasi Google keshida saqlanib qolgan.
Izoh (0)