Qozog‘istonning Aktobe shahrida yashovchi ayol tunlari divanni g‘ichirlatgani uchun qo‘shnisini sudga berdi. Bu xususda “Aktobe Tayms” nashri xabar beradi.
Tibbiyot institutida o‘qituvchilik qilgan, hozirda nafaqada bo‘lgan 75 yoshli Roza Chanisheva qo‘shni kvartiraning egasi va uni ijaraga olgan kishilarni sudga berdi. U javobgarlardan bir million tenge (5,5 ming dollar) miqdorida tovon puli olishni ko‘zlagan edi, lekin sud Chanishevaning da’vosini qisman qondirib, javobgarlardan 50 ming tenge (275 dollarga yaqin) miqdorida pul undirish haqida qaror chiqardi.
“Karavan” gazetasining yozishicha, Chanisheva sudda shunday ko‘rsatma bergan: egasi kvartirani keyingi besh yil davomida boshqa bir qo‘shnisiga ijaraga bergan, u esa go‘yoki bu yerda ishratxona tashkil etgan. Ayolning aytishicha, u bir necha marta tunlari tepa qavatdagi divanning g‘ichirlashidan uxlay olmasdan, qo‘shnilarining uyiga chiqqan. Har safar eshikni turli erkaklar ochgan va u yerda ayollar ham bo‘lgan.
Kvartirani ijaraga olgan kishi esa bu da’voni rad etib, u yerga yuvinish uchun bolalari va nevaralari borganligini aytgan. Keyin esa bu ko‘rsatmasini o‘zgartirib, o‘z uyiga o‘g‘li va kelini joylashib olganligi sababli ijara kvartiraga o‘zi xotini bilan birga borganligini bayon etgan. Kvartira egasi bo‘lsa, o‘z navbatida, qo‘shnilarining shikoyatlaridan bexabar ekanligini ta’kidlagan.
Sud jarayoni yakunlanganidan keyin da’vogarning vakili Luiza Gafarova aytishicha, Qozog‘istonda shu paytgacha bunday ish bo‘yicha qo‘zg‘algan da’volar qondirilmagan.
Qozog‘iston Ma’muriy huquqbuzarliklar to‘g‘risidagi kodeksining 333-moddasiga ko‘ra, tungi paytda tinchlikni buzganlik uchun ogohlantirish yoki jarima tarzida jazo beriladi.
Izoh (0)