Turkmanistonning 2014-yilgi eng yaxshi tumaniga davlat rahbari bir million dollar miqdorida mukofot taqdim etadi. Bu xususda mahalliy ommaviy axborot vositalariga tayanib “Noviy vek” nashri xabar tarqatgan.
Prezidentning so‘zlariga ko‘ra, million dollar mukofot olishni istagan tuman albatta davlatga paxta va g‘alla topshirish bo‘yicha o‘z majburiyatlarini bajarishi, jinoyatchilik va giyohvandlikka qarshi samarali kurash olib borishi, aholini sog‘lom turmush tarzi kechirishga undashi lozim.
Tanlov g‘olibini aniqlash uchun tuziladigan komissiya tarkibiga Turkmanistonning vazirliklari, muassasalari va jamoat tashkilotlaridan vakillar kiritiladi.
Xabarda ta’kidlanishicha, eng yaxshi tuman tanlovi bu yil ikkinchi marta o‘tkazilmoqda. O‘tgan yili mamlakat poytaxti yaqinidagi Oq Bug‘doy tumani shu nomga va mukofotga sazovor bo‘lgan. Kengaytirilgan hukumat yig‘ilishida prezident Gurbanguli Berdimuhamedov ma’lum qilishicha, o‘tgan yilgi g‘olib mukofot puliga tumanda bolalar o‘yin majmuasi barpo etishga qaror qilgan.
Izoh (0)