Toshkentda 7-aprel – Jahon salomatlik kuniga bag‘ishlangan anjuman bo‘lib o‘tdi. Tadbir O‘zbekiston Sog‘liqni saqlash vazirligi va Jahon Sog‘liqni saqlash tashkilotining O‘zbekistondagi vakolatxonasi hamkorligida tashkil etildi. Bu haqda O‘zA xabar berdi.
Jahon Sog‘liqni saqlash tashkiloti 1948-yil 7-aprel kuni tashkil topgan. Ushbu sana Jahon salomatlik kuni sifatida keng nishonlanadi. Har yili ushbu sana munosabati bilan jamiyatimizdagi biror-bir dolzarb tibbiy-ijtimoiy masalaga e’tibor qaratiladi. Joriy yilda ushbu sana transmissiv kasalliklarga qarshi kurashga bag‘ishlandi.
Transmissiv kasalliklar chivin, kana kabi hasharotlar chaqishi oqibatida yuzaga keladi. Dunyoda globallashuv va urbanizatsiya jarayonlari kuchayayotgani, iqlim o‘zgarishi tufayli kelib chiqayotgan ekologik muammolar bunday kasalliklarning tarqalishiga sabab bo‘lmoqda.
O‘zbekistonda bunday kasalliklarning tarqalishi va chetdan kirib kelishining oldini olish, xalqimizning salomatligini muhofazalashga yo‘naltirilgan keng ko‘lamli ishlar amalga oshirilmoqda. Aholiga ko‘rsatilayotgan tibbiy-profilaktika yordamini takomillashtirish, oilada tibbiy madaniyatni yuksaltirishga alohida e’tibor qaratilmoqda. Buning natijasida mamlakatda sanitariya-epidemiologiya muhitni barqaror saqlash, transmissiv kasalliklarning oldini olishga erishilmoqda.
Izoh (0)