“Tetris” o‘yinining 30 yillik yubileyi filadelfiyalik yuzlab ishqibozlar tomonidan o‘ziga xos tarzda nishonlandi – ular o‘yinning “ulkan” versiyasini o‘ynashdi. Bu to‘g‘rida Associated Press xabariga asoslanib TJournal ma’lumot bergan.
Joriy yilning 5-aprel kuni Filadelfiyada dunyodagi eng yirik “Tetris” o‘yini o‘ynaldi. “Tetris”ning Twitter’dagi rasmiy akkauntida ta’kidlanishicha, o‘yin “ekrani” sifatida 29 qavatli Cira Centre binosi tanlangan, uning balandligi esa 133 metrni tashkil etadi.
https://twitter.com/Tetris_Official/statuses/452608804761243648
Geymerlar binodan 800 metr uzoqlikda joylashgan boshqaruv pulti orqali o‘ynashdi. “Tetris” shakllari bino devoriga o‘rnatilgan rangli chiroqlar yordamida hosil qilindi. Odatda bu chiroqlar tunda turli geometrik shakllarni aks ettirib yonib turar edi. Tadbir tashkilotchilari – Frenk Li va boshqalarning fikricha, tunda osmono‘par bino devorida harakatlanayotgan ulkan shakllar tasviri tomoshabinlar va o‘yinchilarni zamonaviy texnologiyalarning imkoniyatlari haqida o‘ylashga undaydi.
“Tetris” o‘yinini rossiyalik dasturchi Aleksey Pajitnov 1984-yilning iyunida yaratgan. O‘tgan asrning 80-yillari oxirida esa u butun dunyo bo‘ylab ommalashib ketgan.
Izoh (0)