50 yoshli dorboz Deni Josslen Fransiya poytaxtida Sena daryosi ustiga 25 metr yuksaklikda qurilgan dordan yurib o‘tdi. Dor ikkita qurilish krani orasiga arqon tortish yo‘li bilan yasalgan bo‘lib, uzunligi 150 metrni tashkil etdi, deb yozadi “ITAR-TASS”.
Bu Josslenning Fransiya asosiy daryosi ustida ikkinchi marta dor qurib o‘tishi edi. Attraksion haqida avvaldan e’lon berilganligi sababli Sena bo‘yida, Austerlits vokzali yonida ko‘p sonli tomoshabinlar, jumladan, sayyohlar yig‘ilishdi.
Shamolli kun bo‘lishiga qaramasdan, Josslen dorda yaxshi harakatlandi va hatto yo‘lning ma’lum bir qismini ko‘zlarini bog‘lagan holda bosib o‘tdi. Ammo u juda sekin yurib, narigi qirg‘oqqa salkam yarim soatda o‘tdi. Yo‘lning yarmiga yetganda, u qo‘lidagi langarini dor ustiga xoch shaklida qo‘yib, ustida yotib dam oldi. Eng ahamiyatlisi – bu harakatlarning barchasini u ehtiyot arqonisiz, ya’ni trosga belidan bog‘lab qo‘yilmagan holatda bajardi.
Deni Josslen taniqli va nufuzli artist bo‘lib, Bryusselda joylashgan, Yevropa Ittifoqida yagona bo‘lgan Yevropa dorbozlar maktabida dars beradi. Bundan tashqari, u pantomima ustasi ham hisoblanib, bu soha bo‘yicha 1970-yillarda shaxsan Marsel Marsodan dars olgan.
Izoh (0)