Ozarboyjonning “Zamonaviy Musovot” partiyasi yetakchisi Hafiz Gajiyev Rossiyaning Liberal-demokratik partiyasi rahbari Vladimir Jirinovskiyning qulog‘ini kesishini aytib tahdid qildi. Bunga sabab – Jirinovskiyning “Ozarboyjon” so‘zini o‘zicha izohlagani bo‘lib, Gajiyev buni tahqirli, deb hisoblagan. Bu haqda Haqqin.az nashri xabar bermoqda.
– “Ozarboyjon” nima degani? Men buni sizlarga ruschaga tarjima qilib beraman. “Ozar” degani – “Hazar”, ya’ni – Kaspiy dengizi; “Bojo” esa – “o‘lka”. Ya’ni bu – “Kaspiy bo‘yida yashovchi kishilar”, deganidir. Ruschasiga aytganda – kaspiyliklar. Nima, bu millat ekanmi? Bu shunchaki o‘sha yerda yashovchilar, deganidir. Xuddi volgaliklar, vologdaliklar... deganday gap.
Bu gap “Zamonaviy Musovot” partiyasi yetakchisiga og‘ir botgan va u shunday degan: “Bu haqorati uchun men shaxsan o‘zim uning qulog‘ini kesaman. Kimki Jirinovskiyga munosib tarzda javob qaytara olmasa, o‘zi unga tenglashib qoladi”.
Shuningdek, Jirinovskiyning bu so‘zlariga Butunrossiya ozarboyjon kongressi ham e’tiroz bildirgan. Tashkilot RLDP yetakchisining chiqishini axloq bo‘yicha deputatlar komissiyasi ko‘rib chiqishini talab etib Davlat Dumasiga maktub yo‘llagan. Shuningdek, Kongress Rossiya Bosh prokuraturasiga ham xat tayyorlagan.
Izoh (0)