Janubiy Koreya qirg‘oq qo‘riqlov xizmati xodimlari Shimoliy Koreyaga tegishli, cho‘kib ketgan yuk kemasining uch nafar dengizchisini qutqarib olishdi. Ular yana ikki nafar ekipaj a’zolarining jasadini ham topishdi, qolgan 11 dengizchining taqdiri esa noma’lum, deb yozadi Associated Press.
Ustiga Mo‘g‘uliston bayrog‘i o‘rnatilgan bu kema cho‘ka boshlagach, halokat signali bergan. Janubiy Koreya qirg‘oq qo‘riqlov xizmati esa dengizchilarni qutqarishga 13 ta kema va oltita aviatexnikani safarbar etgan. Ammo qutqaruv operatsiyasiga noqulay ob-havo sharoiti xalaqit bergan.
Qutqarib olingan kishilarning KXDR fuqarolari ekanligini esa keyinroq bilib qolishgan. Odatda, bu kabi voqealarda Seul o‘z hududlarida aniqlangan Shimoliy Koreya fuqarolarini tezda o‘z vataniga jo‘natib yuboradi. Bu esa ikki mamlakat hanuz o‘zaro urush holatida ekanligi bilan bog‘liq. Zero, 1950–1953-yillardagi Koreya urushi yakunida tinchlik sulhi emas, balki faqatgina yarashuv bitimi imzolangan.
Izoh (0)