Toshkentda oziq-ovqat va qishloq xo‘jaligi xalqaro ko‘rgazmalari o‘z ishini boshladi (foto)

Toshkentdagi “O‘zekspomarkaz” majmuasida “Oziq-ovqat sanoati — WorldFood Uzbekistan—2014” va “Qishloq xo‘jaligi – AgroWorld Uzbekistan—2014” xalqaro ko‘rgazmalari ochildi. O‘zAning ma’lum qilishicha, ko‘rgazmalar O‘zbekiston Respublikasi Qishloq va suv xo‘jaligi vazirligi, Tashqi iqtisodiy aloqalar, investitsiyalar va savdo vazirligi, Fermerlar kengashi, Savdo-sanoat palatasi va ITE Uzbekistan xalqaro ko‘rgazma kompaniyasi tomonidan tashkil etildi.

O‘n to‘rtinchi bor o‘tkazilayotgan WorldFood Uzbekistan—2014 oziq-ovqat sanoati va to‘qqizinchi AgroWorld Uzbekistan—2014 qishloq xo‘jaligi xalqaro ko‘rgazmalarida Xitoy, Koreya Respublikasi, Avstriya, Belgiya, Bolgariya, Germaniya, Ispaniya, Italiya, Qozog‘iston, Latviya, Malayziya, Birlashgan Arab Amirliklari, Polsha, Rossiya, Ruminiya, Slovakiya kabi 22 mamlakatdan 150 dan ziyod kompaniya ishtirok etmoqda.

WorldFood Uzbekistan—2014 xalqaro ko‘rgazmasida Belgiyaning VLAM, Fresh From Belgium, Kipco-Damaco, Glacio va boshqa kompaniyalari keng turdagi go‘sht va sut, dengiz mahsulotlari, meva-sabzavotlarni namoyish etmoqda. Turli salqin ichimliklar, immunitetni mustahkamlaydigan biologik faol qo‘shimchalar namoyish etilgan Janubiy Koreya kompaniyalari stendlari ham bu yerga tashrif buyurganlar e’tiborini tortdi.

– Biz WorldFood Uzbekistan ko‘rgazmasida ilk bor qatnashmoqdamiz, – deydi Sunnuts kompaniyasining xorijiy savdo bo‘yicha menejeri In Yung Bey (Koreya Respublikasi). – Ko‘rgazmaning dastlabki kunida o‘zbekistonlik hamkorlar bilan aloqa o‘rnatdik va shartnomalarni rasmiylashtirishni rejalashtirmoqdamiz. Ekspozitsiyalar yuqori saviyada tashkil etilgan.

Bu yerga kelganlar oziq-ovqat mahsulotlari, ularni ishlab chiqarish, qayta ishlash va ekspertizadan o‘tkazish uskunalari, ichimliklarni quyish va qadoqlash texnologiyalari bilan tanishdi. Masalan, ushbu tadbirda muntazam qatnashib kelayotgan Germaniya kompaniyalari guruhi go‘shtni qayta ishlash, non yopish va muzlatgich uskunalarini namoyish etmoqda.

– Ushbu ko‘rgazmalar O‘zbekistonda oziq-ovqat sanoati izchil rivojlanib borayotganidan dalolat beradi, – deydi PETKUS Technologie Gmbh kompaniyasining savdo bo‘yicha boshqaruvchisi Fedor Frans (Germaniya). – O‘zbekiston iqtisodiyoti katta salohiyatga ega va bu o‘zaro manfaatli hamkorlik uchun keng imkoniyatlar yaratadi. Kompaniyamiz g‘allani qayta ishlash bilan shug‘ullanadi va mazkur ko‘rgazmadagi ishtirokimiz natijasida o‘zbekistonlik hamkorlar bilan ko‘plab shartnomalar tuzish imkoniga ega bo‘ldik. Bundan keyin ham ushbu sohada hamkorlikni kengaytirish niyatidamiz.

O‘zbekiston oziq-ovqat sanoati vakillarining mahsulotlari ham har yilgidek ekspozitsiyalarda keng maydonni egallagan. Salqin ichimliklar, oziq-ovqat mahsulotlari va ularning qo‘shimchalarini ishlab chiqaradigan “Mehrigiyo”, “Top Star Food”, “Good Food Group”, “Carlsberg Uzbekistan”, “Aroma Klassik”, “Agro Bravo” korxonalari shular jumlasidandir. Ular keng turdagi kolbasa, sut mahsulotlari, turli choy navlari, vafli, pechenye, pryanik, shokolod, konfet va boshqa qandolat mahsulotlarini namoyish etmoqda. “Matimex Vostok”, “Xolod sistem servis”, “Engineering Solutions”, “Salar Baraka” va boshqa korxonalar stendlarida oziq-ovqat mahsulotlarini ishlab chiqarish hamda saqlash uskunalari taqdim qilingan.

AgroWorld Uzbekistan—2014 qishloq xo‘jaligi xalqaro ko‘rgazmasida Yevropa kompaniyalari ham faol ishtirok etmoqda. Ular yerga ishlov berish, qishloq xo‘jaligi ekinlarini ekish va parvarish qilish, sabzavot va ziravorlarni terib olish uchun mo‘ljallangan qishloq xo‘jaligi texnikasi, g‘ildirakli traktorlar, ixcham agregatlar, ozuqa o‘rish texnikasini namoyish qilmoqda.

Misol uchun, ko‘rgazmada ilk bor qatnashayotgan Italiya kompaniyalari yerga ishlov berish va bog‘dorchilikka mo‘ljallangan qishloq xo‘jaligi texnikasi, plastik qoplamali yuqori texnologik isssiqxonalar va boshqa mahsulotlarni taqdim qildi.

Mamlakatimiz va chet ellik ishlab chiqaruvchilar O‘zbekiston qishloq xo‘jaligida suvdan foydalanish bo‘yicha zamonaviy yuqori texnologiyalarni joriy qilish borasida keng ko‘lamli ishlar amalga oshirilayotganini inobatga olgan holda, ushbu sohadagi eng so‘nggi ishlanmalarni namoyish etmoqda. Masalan, Sho‘rtan gaz-kimyo majmuasiga qarashli “Polipropilen quvurlar” sho‘ba korxonasi polipropilen quvur va fitinglar, ekinlarni tomchilatib sug‘orish uchun berkitish-rostlash armaturalarini namoyish qilmoqda. Xitoyning Lutian Machinery kompaniyasi vakillari tadbir ishtirokchilarini suv chiqarish nasoslari bilan tanishtirdi. Ushbu sug‘orish texnologiyalari xalqaro ko‘rgazmaga kelgan fermerlarda katta qiziqish uyg‘otmoqda.

Qishloq xo‘jaligi texnikasi, issiqxona va o‘simliklarni himoya qilish vositalarini ishlab chiqaradigan korxonalar orasida ilk bor ishtirok etayotganlari ham anchagina. Masalan, Pas Reform (Niderlandiya) kompaniyasi inkubatsiya texnologiyalari sohasidagi eng so‘nggi ishlanmalarini taqdim etayotgan bo‘lsa, Germaniyaning Big Dutchman kompaniyasi keng turdagi parrandachilik uskunalarini namoyish qilmoqda.

– O‘zbekistonda qishloq xo‘jaligining jadal rivojlanib borayotgani va mamlakatingiz bozori katta istiqbolga ega ekani tahsinga sazovordir, – deydi Prinzen BV kompaniyasining savdo bo‘yicha menejeri Edvin Vaags (Niderlandiya). – Xususan, O‘zbekistonning parrandachilik sohasidagi katta salohiyatini inobatga olib, tovuq tuxumlarini inkubatorda ochirish, joylashtirish va qadoqlash texnologiyasini taqdim etdik. Hamkorlik qilish uchun bir qancha takliflar oldik. Jumladan, mahsulotimiz fermer xo‘jaliklari vakillarida katta qiziqish uyg‘otmoqda.