Toshkent markaziy ko‘chalarida 85 ta yangi turdagi matbuot do‘konlari o‘rnatildi
“Matbuot tarqatuvchi” aksionerlik kompaniyasi tomonidan bosma ommaviy axborot vositalari mahsulotlarini yanada rivojlantirish, nashrlar obuna narxlarini arzonlashtirish, gazeta va jurnallarning o‘z vaqtida mushtariylarga yetib borishini ta’minlash bo‘yicha amalga oshirilayotgan chora-tadbirlar muhokamasiga bag‘ishlangan matbuot anjumani o‘tkazildi. Bu haqda kompaniya matbuot markazi xabar berdi.
Tadbirda “Matbuot tarqatuvchi” aksionerlik kompaniyasi bosh direktori Suvon Najmiddinov ta’kidlaganidek, kompaniya tizimidagi korxonalarda vaqtli matbuot nashrlarini iste’molchiga tez va sifatli yetkazib berish hamda aholiga qo‘shimcha xizmatlar ko‘rsatish sifatini yanada takomillashtirishni ta’minlash maqsadida “2011—2014-yillarda vaqtli nashrlarni tarqatish tarmog‘ini zamonaviylashtirish va xizmatlarning yangi turlarini joriy etish dasturi” qabul qilinib, rejalashtirilgan ishlar amalga oshirib kelinmoqda.
Ma’lum bo‘lishicha, dastur doirasida tarmoqdagi kioskalarning 737 tasi joriy va 218 tasi kapital ta’mirlandi, marketing tadqiqotlariga asosan aholi gavjum joylarga 128 dona yangi kioskalar joylashtirildi hamda poytaxtimiz markaziy ko‘chalarida yangi tipdagi kioskalardan 85 donasi o‘rnatildi.
Vaqtli matbuot nashrlarini mushtariylarga tarqatishda kompaniyada 14 ta viloyat pochta aloqasi filiallari, “Xalqaro pochtamt” filiali, barcha tuman pochta bog‘lamasi va aloqa bo‘limlari bilan hamkorlik yo‘lga qo‘yilgan.2014-yil obunasini uyushtirishda mushtariylarga yanada ko‘prok qulaylik yaratish maqsadida aholi gavjum va tashkilotlar ko‘p joylarda joylashgan 840 ta “Matbuot” kioskalari orqali vaqtli matbuot nashrlariga obuna qilish tashkil qilindi.
Ta’kidlash lozimki, obuna to‘lovlarini plastik kartochkalar orqali qabul qilishni tashkillashtirish mijozlarga qulaylik yaratadi. Shu munosabat bilan kompaniya shoxobchalarida terminallar soni 273 taga ko‘paytirildi.Shuningdek, chakana savdo tizimida o‘tgan yillar davomida 134 turdagi kitob mahsulotlari savdoga chiqarilgan bo‘lsa, bugungi kunda 1400 ga yaqin har xil turdagi kitob mahsulotlari tarmoq kioskalari orqali xaridorlarga tadim etilmoqda.
