Qashqadaryodagi sintetik yonilg‘i ishlab chiqarish loyihasiga Qatar Petroleum jalb etiladi
O‘zbekiston hukumati Qashqadaryo viloyatida sintetik yonilg‘i (GTL) ishlab chiqarish loyihasiga Qatar Petroleum’ni jalb etishni rejalashtirmoqda. Bu haqda O‘zbekiston hukumatidagi manbalarga asoslanib, “Noviy vek” nashri xabar bermoqda.
Manbaning ma’lum qilishicha, hozirga kelib Qatar Petroleum bilan muzokaralar tadbirining rejasi tuzilgan va uning natijalari may oyida ma’lum bo‘ladi.
2009-yil noyabrida “O‘zbekneftgaz” xolding kompaniyasi Janubiy Afrikaning Sasol va Malayziyaning Petronas kompaniyalari bilan hamkorlikda “Sho‘rtangazkimyo” majmuasi bazasida GTL zavodini qurish bo‘yicha Uzbekistan GTL qo‘shma korxonasini tashkil qilgan edi.
Dastlab Sasol va “O‘zbekneftgaz”ning loyihadagi ulushi 44,5 foizdan, Petronasniki esa 11 foizdan iborat edi. Biroq 2013-yil yozida Sasol o‘z ulushini 25,5 foizga qisqartirishini ma’lum qildi, qolgan ulush esa yo boshqa aksionerlar o‘rtasida qayta taqsimlanishi yo yangi investorga topshirilishi kerak.
Umumiy qiymati 5,6 milliard dollarga teng bo‘lgan va qurilishi 2017-yil avgustida yakuniga yetishi kutilayotgan loyiha yiliga 3,5 milliard kubometr gazni qayta ishlash va 864 ming tonna dizel yonilg‘isi, 304 ming tonna aviakerosin, 395 ming tonna neft va 11,2 ming tonna siqilgan gazni ishlab chiqarish imkonini beradi, deb yozadi “Kun” nashri.
Korxonaning texnologik tomonini Janubiy Koreyaning Hyundai Engineering & Construction kompaniyasi amalga oshiradi. Hozirgi vaqtda O‘zbekiston tomoni asosiy obyekt infratuzilmalarini bunyod etmoqda.
