Россия расмийлари 7 сентябрь куни Германиянинг Санкт Петербургдаги сўнгги минтақавий Бош консуллиги ёпилишини эълон қилди. Тегишли қарор Берлиннинг Бонндаги Россия Бош консуллигини ёпиши ҳақидаги хабарига жавоб бўлди. Бу ҳақда Deutsche Welle ва “Коммерсант” нашрлари хабар берди.
Маълум қилинишича, қарор “Германия томонининг душманона ҳаракатлари сабабли” қабул қилинган. Германия Бош консуллиги 2026 йил 18 сентябрдан кечиктирмасдан ўз фаолиятини тўхтатиши лозим. Барча ходимлар бу муддатгача Россия Федерациясини тарк этиши шарт.
Қолаверса, Россиядаги Гёте институти филиаллари ҳам фаолиятини тўхтатиши керак. Уларнинг ходимларига 2026 йил 13 сентябрдан кечиктирмасдан Россияни тарк этиш буюрилди, дейилади хабарда.
Таъкидланишича, Германия дипломатик миссияси раҳбари Россия Ташқи ишлар вазирлигидан тегишли ноталарни қабул қилиб олган. Россия Ташқи ишлар вазирлиги Германия расмийларини икки томонлама муносабатларни “янги босқичда кескинлаштиришда” айблади. Аввалроқ Россия ташқи ишлар вазири Сергей Лавров Гёте институти филиаллари ёпилишини эълон қилган эди.
Бонндаги Россия Бош консуллиги ва Берлиндаги Россия уйининг ёпилиши
Германия расмийлари 1 сентябрь куни Бонндаги Россия Бош консуллиги ҳамда Берлиндаги Россия уйи ёпилишини эълон қилган. Бу қарор август ойи бошида Лейпциг/Ҳалле аэропортида режалаштирилган терактга жавобан қабул қилинган.
Германия ташқи ишлар вазири Иоганн Вадефул ва ички ишлар вазири Александр Добриндт ҳодиса бўйича тергов натижаларини расман эълон қилган. Тергов Россия расмийларининг бу ишга алоқадорлигини кўрсатган.
Германия Бонндаги Россия Бош консуллигини ёпиш ва Берлиндаги Россия уйи бўйича келишувни бекор қилишдан ташқари, Россия фуқаролари учун кириш назоратини ҳам кучайтиради. Шунингдек, Россиянинг “соялар флоти”га қарши чораларни қатъийлаштиради. Айни пайтда, Европа Иттифоқи ва НАТО, шунингдек, бир қатор Европа ҳукуматлари Германияни қўллаб-қувватлашини билдирди.
4 август куни Лейпциг аэропортида Украинанинг Ан-124 юк самолётига қарши қўпорувчилик ҳаракати содир бўлган эди. ОАВнинг Германия тергов идораларига таяниб хабар беришича, бу ҳужумда бир нечта дрон иштирок этган.
Портловчи модда ортилган учувчисиз аппаратлардан бири бир нечта Украина юк самолётлари яқинида топилган. Иккинчи дрон эса биринчи дрон топилганидан бир неча дақиқа ўтиб, DHL юк самолётига келиб урилган.
Аввалроқ Венгрия 10 нафар россиялик дипломатни ҳайдаб юборгани ҳақида хабар берилганди. Улар Вена конвенциясига зид равишда фаолият юритгани маълум қилинган. Бу собиқ бош вазир Виктор Орбаннинг Россияни қўллаб-қувватловчи сиёсати тугаганини кўрсатмоқда.
