Профессионал бокснинг супер ўрта вазн тоифасида WBA йўналиши бўйича асосий даъвогар ҳисобланган Мелиқўзиев ташкилотнинг амалдаги чемпиони, мексикалик Хайме Мунгуяга қарши рингга чиқиш истагини билдирди.
“Bek Bully” аввалроқ бу ҳақда ижтимоий тармоқлардаги саҳифаси орқали маълум қилган эди. Ўзбекистонлик боксчи Мунгуяга 31 октябрь куни бўлиб ўтадиган Мехиcо вс The World профессионал бокс оқшоми доирасида жанг ўтказишни таклиф қилди.
Мазкур бокс оқшомининг марказий жанги Сауль Алварес ва Кристиан Мбилли ўртасида бўлиб ўтиши режалаштирилган.
Маълумот учун, Бектемир Мелиқўзиев айни пайтда WBA рейтингида биринчи ўринни эгаллаб турибди. Ўзбекистонлик боксчи сўнгги жангида ганалик Сена Агбекони техник нокаут эвазига мағлуб этиб, WBA қитъалараро чемпионлик камарини муваффақиятли ҳимоя қилган эди.
Мазкур ғалаба Мелиқўзиевнинг профессионал рингдаги 17-ғалабаси бўлди. Унинг ҳисобида биргина мағлубият мавжуд. Суперўрта вазн тоифасининг WBA йўналишидаги амалдаги чемпиони Хайме Мунгуя ҳисобланади.
30 ёшли ўзбекистонлик чарм қўлқоп устаси айни пайтда профессионал бокс бўйича собиқ Жаҳон чемпиони Оскар де ла Ҳояга тегишли бўлган Golden Бой промоутерлик компанияси билан ҳамкорлик қилиб келмоқда.
