АҚШда самолёт учиш йўлагидан чиқиб кетди ва машиналарга урилди. Қурбонлар бор (видео)

АҚШнинг Маями халқаро аэропортида 6 сентябрь куни Amazon Prime Air компаниясининг юк самолёти қўниш чоғида учиш-қўниш йўлагидан чиқиб кетди. Оқибатда камида беш киши ҳалок бўлди. Бу ҳақда Reuters хабар берди.

Маълум қилинишича, Prime Air компаниясининг 7598-рейси маҳаллий вақт билан соат 14:00 атрофида аэропортнинг диогонал йўлагидан чиқиб кетган ва бир нечта автомобилга бориб урилган.

Ҳодисада яна беш киши жароҳатланган. Улардан уч нафари оғир аҳволда. Самолёт урилган машиналарда камида икки киши қолиб кетган. Шунингдек, учувчи ва иккинчи учувчи ҳам самолёт ичида қисилиб қолган. Расмийлар ҳалок бўлганларнинг шахсини очиқлашдан бош тортди.

Воқеа жойига 60 дан ортиқ қутқарув бўлинмаси ва 200 га яқин ходим жалб этилди. Тушдан кейин мутахассислар самолётдан ёнилғи сизиб чиқишини тўхтатиш билан шуғулланди. Аэропорт ҳалокатдан сўнг барча рейсларни тўхтатган эди. Ўша куни кечқурун тўртта йўлакдан иккитаси қайта очилди.

Flightradar24 хизматига кўра, самолёт Пуэрто Риконинг Сан Ҳуан шаҳридан учган. Бу Boeing 767-300 юк самолёти 32 йилдан бери химат қилиб келаётганди. Учоқ 1994 йилдан 2015 йилгача турли авиакомпанияларда йўловчи самолёти бўлиб хизмат қилган.

Amazon вакилининг билдиришича, бу самолётни Amazon учун 21Air юк авиакомпанияси бошқарган.

“Бугун Маямида самолётимиз билан содир бўлган ҳалокатдан қайғудамиз. Ҳалок бўлганларнинг оилалари ва яқинларига ҳамдардлик билдирамиз”, дейилади 21Air сайтидаги хабарда.

Воқеа жойидан олинган суратларида самолётнинг бурни ерга тегиб, думи юқорига кўтарилиб қолгани кўринади. Ўнг томонида ёнғин излари бор. Flightradar24 маълумотларига кўра, самолёт йўлакдан чиқиб кетаётганда тезлиги соатига 207 километр бўлган.

АҚШ фуқаро авиацияси ҳалокатларини тергов қилувчи Миллий транспорт хавфсизлиги кенгаши ҳодисани ўрганиш учун Женнифер Ҳоменди бошчилигидаги гуруҳни юборди. Ҳолат юзасидан 7 сентябрь куни Маямида биринчи брифинг ўтказилади. Amazon компанияси ҳозирча ҳодиса тафсилотларини тўпламоқда.

“Нима бўлганини аниқ тушуниш учун маҳаллий ҳокимият билан яқиндан ишлаяпмиз. Ҳозирги асосий вазифамиз жабрланганлар хавфсизлиги ва уларнинг ҳолидан хабар олишдир”, деди Amazon компанияси вакили Келли Нантел.

Куни кеча Грецияда қирувчи самолёт авиашоу вақтида қулаб тушгани ҳақида хабар берилганди. Воқеа Ф-4 Phantom қирувчиси билан юз берган. Самолётни бошқараётган ҳар иккала учувчи ҳалок бўлган.