Ижтимоий тармоқларда Туркиянинг DİLAHAN TURİZM компанияси “Андижон” футбол клуби устидан судга даъво аризаси киритишни режалаштираётгани ҳақида хабарлар тарқалган эди. Бугун клуб матбуот хизмати мазкур можароли ҳолат юзасидан расмий муносабат билдирди.
Низо 2026-йилги мавсум олдидан Анталияда ташкил этилган ўқув-машғулот йиғинлари билан боғлиқ. Туркия компанияси кўрсатилган хизматларнинг умумий қиймати 280 141 еврони ташкил этгани, шундан 210 минг евродан зиёди тўлангани, бироқ қарийб 70 минг евро қолиб кетганини иддао қилганди.
Тўлов кечиктирилгани учун ҳисобланган пеня (кунига 0,1 фоиз) ҳамда юридик хизматлар харажати қўшилиб, турк томонининг ундирмоқчи бўлган умумий суммаси 85 минг еврога яқинлашгани айтилган эди.
“Андижон” футбол клуби ўз баёнотида турк компанияси билан ҳақиқатан ҳам ҳамкорлик қилинганини ва ўртада молиявий мажбуриятлар бўлганини тасдиқлади. Бироқ айни пайтда компания олдида ҳеч қандай қарз қолмаганини маълум қилди.
“Жамоанинг Анталиядаги ўқув-машғулот йиғини давомида қайд этилган компания хизматларидан фойдаланилган ва ҳамкорлик доирасида муайян молиявий мажбуриятлар бўлган. Бироқ клуб томонидан тўловлар белгиланган тартибда аллақачон тўлиқ қопланган. ‘Андижон’ ўз зиммасидаги молиявий мажбуриятларга доимо масъулият билан ёндашади”, дейилади хабарда.
Шунингдек, клуб ижтимоий тармоқ фойдаланувчилари ва ОАВ вакилларини тарқалаётган хабарларни бир томонлама талқин қилмасликка ҳамда фақат расмий манбаларга таянган ҳолда хулоса чиқаришга чақирган.
