АҚШ терма жамоаси ва “Монако” клуби ҳужумчиси Фоларин Балогун учун курашга “Астон Вилла” ҳамда “Барселона” клублари ҳам қўшилди. Бу ҳақда L’Equipe нашри маълум қилди.
Аввалроқ Лондоннинг “Тоттенҳэм” клуби америкалик футболчининг трансфери бўйича Франция клуби билан музокараларни бошлагани ҳақида хабарлар тарқалган эди.
25 ёшли Балогун ўтган мавсумда “Монако”нинг асосий футболчиларидан бирига айланди. У барча мусобақаларда 43 та учрашувда майдонга тушиб, 19 та гол урди. Ҳужумчи АҚШ терма жамоаси сафида ҳам ЖЧ-2026 да ўзининг яхши ўйинлари билан эътибор қозонди. Шуниндек, унинг мундиал 1/16 финалидан ўрин олган Босния ва Герсеговинага қарши баҳсда олган қизил карточкаси ва дисквалификация муддати америкалик расмийларнинг аралашуви билан бекор қилинган эди. Натижада футболчи Бельгияга қарши кечган 1/8 финал (1:4) баҳсида майдонга тушган.
Ҳозирча Балогун учун асосий даъвогарлардан бири “Тоттенҳэм” бўлиб турибди. Лондон клуби ҳужумчи трансфери учун қарийб 60 миллион евро таклиф қилишга тайёр. Шунингдек, “шпорлар” “Манчестер Сити” ҳужумчиси Омар Мармуш билан ҳам деярли келишувга эришган.
Балогуннинг “Монако” билан амалдаги шартномаси 2028 йил июнигача мўлжалланган. Шунга қарамай, монаколиклар трансфер ойнаси ёпилгунига қадар футболчини сотишга тайёр.
“Астон Вилла” Балогунни Олли Уоткинс “Ал-Ҳилол”га ўтган тақдирда унинг ўрнига олиб келишни режалаштирмоқда. “Барселона” ҳам америкалик ҳужумчининг трансферига қизиқиш билдирган.
Айни пайтда Балогуннинг “Монако” машғулотларига қайтиши кутилмоқда. У Конференциялар Лигаси саралаш босқичи доирасида Польшанинг “Гурник” клубига қарши жавоб учрашувида майдонга тушиши мумкин. Бироқ трансфер ойнаси ёпилгунига қадар ҳужумчининг жамоасини ўзгартириш эҳтимоли ҳам сақланиб қолмоқда.
