Ўзбекистонлик аралаш яккакураш устаси Рамазон Темировнинг навбатдаги жанг тафсилотлари расман тасдиқланди.
UFC матбуот хизматининг хабар беришича, ўзбекистонлик MMA жангчиси 24 октябрь куни БААнинг Абу-Даби шаҳридаги “Etihad Arena” мажмуасида ўтказиладиган UFC 333 турнирида октагонга кўтарилади.
Ўта енгил вазн тоифасида ташкил этиладиган мазкур баҳсда Темировга англиялик Лоун Кавана рақиблик қилади. Аҳамиятлиси шундаки, ҳозирда ҳар икки спортчи рейтингда ёнма-ён бормоқда: Кавана ушбу дивизионда олтинчи, Темиров эса еттинчи поғонани банд этиб турибди.
Эслатиб ўтамиз, 29 ёшли Рамазон Темиров ўзининг сўнгги жангини ҳам айнан Абу-Дабида ўтказган эди. 25 июль куни бўлиб ўтган UFC Fight Night 282 турнирининг марказий баҳсларидан бирида (асосий жангдан олдинги тўқнашув) у австралиялик Стив Эрсегга қарши октагонга кўтарилган.
Ушбу қарама-қаршиликда Темиров 30 ёшли рақибини биринчи раунддаёқ нокаутга учратиб, ўзининг 22-жангидаги 20-ғалабасини тантана қилган эди. Эрсег учун эса бу профессионал фаолиятидаги 19-жангда қабул қилиб олинган 5-мағлубият бўлганди.
