Аргентина терма жамоаси сардори Лионель Мессининг насабида Бразилия билан боғлиқ илдизлар мавжуд экани аниқланди. Бу ҳақда Бразилиянинг Globo нашри италиялик тарихчи Фёренсо Сантини олиб борган генеалогик тадқиқот натижаларига таяниб хабар берди.
Тадқиқотга кўра, Мессининг она томондан катта боболаридан бири Федерико Куччиттини 1904 йил 27 январь куни Бразилиянинг Сан-Паулу штатидаги Рибейран-Прету шаҳрида таваллуд топган. Унинг ота-онаси — италиялик Ранеро Куччеттини ва Роза Риккезза 1899-йилда Бразилияга келиб, Сан-Паулу штатидаги фермер хўжаликларида меҳнат қилган.
Тарихчи Фёренсо Сантинининг таъкидлашича, айнан Бразилияда оила фамилияси ўзгарган. Рўйхатга олиш жараёнида Ардериго Куччеттинига Федерико исми берилган, Коҳcеттини фамилияси эса Кучиттини шаклида қайд этилган. Кейинчалик айнан шу фамилияни Мессининг онаси Селия Мария Куччиттини ҳам олиб юрган.
Федерико туғилганидан бир йил ўтиб, оила Аргентинанинг Росарио шаҳрига кўчиб ўтган. Кейинчалик айнан шу шаҳарда Лионель Месси дунёга келган.
Сантинининг сўзларига кўра, у Месси оиласи тарихини футболчи "Барселона" сафида порлай бошлаган даврда ўрганишни бошлаган. Изланишлар 2019–2022-йиллар давом этган ва натижада футболчининг она томондан насаб шажараси тикланган.
Тарихчи, шунингдек, Италияда деярли учрамайдиган Куҳcиттини фамилияси Месси оиласининг Бразилия билан боғлиқлигини аниқлашда муҳим омил бўлганини қайд этди.
Маълумотларга кўра, ҳозирда Лионель Мессининг Бразилияда истиқомат қилаётган яқин қариндошлари йўқ. Оиласи 1905-йилда Бразилияни тарк этиб, Аргентинага кўчиб ўтган.
