Нигерия ксенофобик (хорижликлардан қўрқиш ва уларни ёмон кўриш) ҳужумлар ортидан Жанубий Африкадан 1490 нафар фуқаросини ихтиёрий равишда эвакуация қилишни якунлади. Бу ҳақда 16 июль куни мамлакат Ташқи ишлар вазирлиги маълум қилди. Йўловчилар бўлган сўнгги самолёт Йоханнесбург шаҳридан учиб келди.
Ташқи ишлар вазирлиги расмийси Кимиэби Эбиэнфанинг билдиришича, бешинчи эвакуация рейси 15 июль куни Лагос шаҳрига қўнган. Ушбу самолётда 305 нафар фуқаро ва икки нафар ҳукумат вакили ватанига қайтиб келди.
Нигерия ҳукумати ушбу эвакуация Жанубий Африка расмийлари билан ўтказилган музокаралардан сўнг амалга оширилганини билдирди. Музокараларда хорижликлар, жумладан, нигерияликларга қарши ксенофобик ҳужумлар билан боғлиқ хавфсизлик масалалари муҳокама қилинган.
Нигерия ўз фуқароларига нисбатан Жанубий Африкада содир этилган зўравонликларни кескин қоралади. Ҳужумлар оқибатида камида икки нафар Нигерия фуқароси ҳалок бўлган. Маълумотларга кўра, уларга Жанубий Африка хавфсизлик хизмати ходимлари ҳужум қилган.
Жанубий Африка билан икки томонлама мустаҳкам алоқаларга қарамай, Нигериянинг позицияси ўзгаришсиз қолмоқда. Вазирлик расмийси Кимиэби Эбиэнфанинг таъкидлашича, ксенофобия, ирқий нотолерантлик ва Нигерия фуқароларига нисбатан зўравонлик ҳолатларига асло йўл қўйиб бўлмайди.
Жанубий Африкада 30 июнь куни бўлиб ўтган мигрантларга қарши намойишларда 900 дан ортиқ киши ҳибсга олинган. Пойтахт Йоханнесбургда бир киши отиб ўлдирилган. Аҳоли ҳужжатсиз муҳожирларнинг мамлакатдан чиқиб кетишини талаб қилган.
