Жаҳон чемпионати ҳал қилувчи паллага кирди. 19 июль, якшанба кунги финал 39 ёшли Лионель Месси учун халқаро фаолиятидаги сўнгги учрашув бўлиши эҳтимоли юқори. Энг қизиғи, афсонавий ҳужумчи ушбу хайрлашув учрашувини бир пайтлар унинг тақдирини бутунлай ўзгартириб юбориши мумкин бўлган жамоага — Испанияга қарши ўтказади.
Испания терма жамоасида ўйнаш имконияти
2005 йил бошида Колумбияда ўтган ёшлар ўртасидаги Жанубий Америка чемпионатида 17 ёшли, ҳаммадан бўйи паст, лекин тўп билан яхши ҳаракат қиладиган йигитча порлаб чиққанди. Ўша пайтда у кўпчиликка номаълум эди. 13 ёшида Испанияга кўчиб ўтган Месси “Барселона”да ўйнарди ва Испания уни ўз миллий жамоасига жалб қилишга қаттиқ уринаётган эди.
Аммо Аргентина тезроқ ҳаракат қилиб, турнир қаҳрамонини илиб кетди. Месси ўз ватани сафида 2005-йилнинг августида Венгрияга қарши баҳсда дебют қилди (ва ғалати тасодиф туфайли биринчи дақиқадаёқ қизил карточка олди). Ўша йиллари Испания кетма-кет йирик турнирларда (Евро-2008, ЖЧ-2010, Евро-2012) зафар қучаётган, Аргентина эса инқирозни бошидан кечираётган даврлар эди. Шу сабабли, бир муддат Месси ўз танлови учун кескин танқидларга ҳам учраган.
Ўша машъум стадион ва Мессининг қайтиши
Роппа-роса 10 йил олдин, ЖЧ-2026 финали ўтказиладиган худди шу Нью-Жерсидаги стадионда Месси Америка Кубоги финалида Чилидан мағлубиятга учраган ва кўз ёшлари билан терма жамоадаги фаолиятини якунлаганини эълон қилган эди.
Кейинчалик, у бу қароридан қайтди. Ўтган беш йил ичида Аргентина узоқ йиллик омадсизликларга чек қўйиб, иккита Америка Кубоги ва ЖЧ-2022 бош совринини қўлга киритди. Энди эса Лео ўзи учун ўта оғир хотираларга эга бўлган стадионда карьерасини якунлаши мумкин.
Устоз ва шогирд жанги
Финал нафақат футболчилар, балки мураббийлар ўртасидаги ўзига хос тўқнашув ҳамдир. Қарийб 10 йил аввал Аргентина устози Лионель Скалони Испанияда мураббийлик курсларида таҳсил олаётганида, унинг ўқитувчиларидан бири айнан амалдаги Испания терма жамоаси бош мураббийи Луис де ла Фуэнте бўлган.
Яна бир қизиқ факт: мусобақа бошида Де ла Фуэнтедан Испания сафида қайси хорижлик футболчини кўришни исташи сўралганда, у иккиланмасдан “Хулиан Алварес” деб жавоб берган. Энди эса у айнан Алварес ва Мессининг биргаликдаги ҳужумларини тўхтатиш ҳақида бош қотириши керак. Англия термаси устози Томас Тухель каби бутун жамоа билан ҳимояга ётиб олиш — Испанияга хос услуб эмас. Испанлар худди яримфиналда французларни тўпсиз қолдирганидек, тўп назорати орқали Мессини ҳам ёпишга уриниб кўришади. Бу эса ҳақиқий тактик жангга айланади.
Амалга ошмаган “Финалиссима” ўрнига энг катта мукофот
Аслида, бу икки жамоа март ойида “Финалиссима” (Европа ва Жанубий Америка чемпионлари ўртасидаги кубок) доирасида тўқнаш келиши керак эди. Аммо халқаро тақвимдаги тиғизлик ва Яқин Шарқдаги сиёсий вазият сабаб март ойида Доҳада ўтиши белгиланган ўйин бекор қилинганди. Ўшанда Испания муқобил вариант сифатида Европа шаҳарларини, Аргентина эса Буэнос-Айресни таклиф қилди, аммо якунда келишувга эришилмади. Энди эса келишишнинг кераги йўқ. Икки қитъа чемпионлари барибир тўқнаш келмоқда, фақат бу сафар ўртага футбол оламидаги энг олий ва нуфузли мақом тикилган.
