Франция миллий жамоаси сардори Килиан Мбаппе ЖЧ-2026 ярим финалида Испаниядан учралган мағлубиятдан (0:2) сўнг учрашув ҳақидаги фикрлари билан ўртоқлашди. 27 ёшли ҳужумчи жамоасининг тактик ва техник хатоларини тўлиқ тан олди.
Францияликлар етакчиси ўйиндан сўнг М6 телеканалига берган интервьюсида жамоасининг хатолари ва келгуси режалари ҳақида қуйидагиларни айтиб ўтди:
“Биз тактик, техник ва умумий ўйин даражаси нуқтайи назаридан ўзимиз хоҳлаган ўйинни намойиш эта олмадик. Жаҳон чемпионати ярим финалида ўз вазифангни тўғри бажармасанг, ғалаба қозона олмайсан. Асосий мақсадимиз рақибни олдинга ўтиб прессинг қилиш ва уларнинг секин, назоратли ўйин ритмига тушиб қолишига йўл қўймаслик эди, чунки ўйинни назорат қилишда улар биздан анча кучлироқ. Аммо буни уддалай олмадик. Майдон марказида доимий равишда 3 га 2 ҳолатида, яъни озчилик бўлиб қолдик, Испанияга қарши ўйинда эса бу ўта жиддий муаммо ҳисобланади. Буларнинг барчаси йиғилиб, якунда мағлубиятга олиб келди. Аслида финалга чиқиш ва тарих яратиш бизнинг энг катта мақсадимиз эди. Мен доим айтаман: ғалабани қандай қабул қилсак, мағлубиятни ҳам шундай, бошни баланд кўтарган ҳолда қабул қилиш лозим. Ҳозир бутун жамоа жуда тушкун ҳолатда, йигитларнинг хафсаласи пир бўлганини сўз билан таърифлаб бериш қийин. Бироқ, ўзимизни қўлга олиб, таътилга чиқишимиз ва фаолиятимизнинг кейинги саҳифасини очишимиз керак. Футбол ҳеч кимни кутиб турмайди. Барчасини бошидан бошлаб, бу мағлубиятни ортда қолдиришимиз ва ундан тўғри хулоса чиқаришимиз шарт”, дейди Мбаппе.
Эслатиб ўтамиз, ЖЧ-2026 яримфиналида Франция Испанияга 0:2 ҳисобида имкониятни бой берди. Учинчи ўрин учун баҳсда “учранглилар” Аргентина ва Англия ўртасидаги иккинчи ярим финал ўйинида мағлуб бўлган жамоага қарши майдонга тушади. Мазкур баҳс 18 июлдан 19 июлга ўтар кечаси Тошкент вақти билан 02:00 да бошланади.
