Футбол бўйича 2026-йилги Жаҳон чемпионатининг чоракфинал ўйинлари ўз ниҳоясига етди ва яримфинал босқичининг барча иштирокчилари аниқланди.
Чоракфиналнинг сўнгги баҳсида Аргентина миллий жамоаси Швейцария устидан 3:1 ҳисобида зафар қучди. Натижада, Лионель Скалони бошчилигидаги жамоа яримфиналда Англия билан тўқнаш келадиган бўлди. Эслатиб ўтамиз, инглизлар ўз учрашувида Норвегияни мағлуб этган эди (2:1).
Мусобақанинг дастлабки яримфинал жуфтлиги бундан олдинроқ шаклланган бўлиб, унда финал йўлланмаси учун Франция ва Испания миллий жамоалари ўзаро баҳс олиб бориши белгиланган.
Яримфинал ўйинларининг санаси ва вақтлари билан танишишингиз мумкин:
- Франция — Испания (15 июль куни соат 00:00);
- Англия — Аргентина (16 июль куни соат 00:00).
Маълумот учун, ЖЧ-2026 мусобақаси АҚШ, Канада ва Мексика яшил майдонларида 11 июндан 19 июлга қадар давом этади. Мусобақанинг амалдаги ғолиби Аргентина миллий жамоаси ҳисобланади. Улар 2022-йили Қатарда ўтказилган Жаҳон чемпионати финалида Францияни пенальтилар сериясида (асосий ва қўшимча вақт — 3:3, пенальтилар — 4:2) мағлуб этган эди.
