FIFA президенти Жанни Инфантино 2030-йилги Жаҳон чемпионатидан бошлаб иштирокчилар сонини 64 тага етказиш ташаббуси билан чиқмоқчи. Бу ҳақда таниқли журналист Ромен Молина ўзининг X (собиқ Twitter) саҳифасида маълум қилган.
Манбага кўра, мусобақани янада кенгайтириш ғояси Инфантинонинг 2027-йилги сайловолди дастурининг асосий қисми ҳисобланади. У ушбу режасини амалга оширишда ўзига яқин бўлган африкалик футбол мутасаддиларининг ёрдамига таянмоқчи. Бунинг эвазига эса Африка қитъаси вакиллари ташкилот уставига ўзгартириш киритишни талаб қилади. Қайд этилишича, айнан мана шу ҳуқуқий ўзгариш Инфантинога келажакда яна бир муддатга FIFA президентлигига ўз номзодини қўйиш имконини яратиб беради.
Ташкилот раҳбари жамоалар сонини яна ошириш масаласи кун тартибига чиқиши мумкинлигини яширмаяпти:
“Фақатгина Европа ва Жанубий Америка эмас, балки бутун дунё Жаҳон чемпионатида ўйнашни орзу қила олиши керак”, дейди Инфантино.
Шунингдек, FIFA раҳбари ҳозир бўлиб ўтаётган ЖЧ-2026 мусобақасида иштирокчилар сонининг 48 тага етказилганини улкан муваффақият деб атаган. Эслатиб ўтамиз, АҚШ, Канада ва Мексика яшил майдонларида ўтаётган мундиал тарихда илк бор 48 та жамоа иштирокида ўтказилмоқда.
