НАСА телескопини Ерга қулашдан қутқариш учун орбитага махсус коинот кемаси учирилди. Қутқарув миссияси роботдан ташкил топган. Бу ҳақда Euronews хабар берди.
Link деб номланган уч панжали робот 3 июль куни Маршалл оролларидан коинотга йўл олди. У ўз манзилига етиб бориши учун тахминан бир ой вақт кетади. Роботнинг мақсади — Neil Gehrels Swift Observatory телескопини қутқариш. Ушбу телескоп 2004 йилдан бери Ер атрофида айланиб юрибди.
Swift кутилганидан тезроқ пастлаётган эди. Сўнгги кунларда қуёш фаоллиги ошган. Бу эса Ер атмосферасининг ташқи қатламини қиздирди ва кенгайтирди. Натижада қўшимча қаршилик пайдо бўлиб, телескопни пастга торта бошлади. НАСАда уни қутқариш учун вақт жуда кам қолганди.
Космик агентлик Katalyst Space Technologies стартапига 30 миллион доллар тўламоқда. Компания Swift’ни тутиб олиши ва уни хавфсиз орбитага кўтариши керак. Шундан сўнг телескоп коинотдаги кучли портлашларни ва юлдузлар ҳалокатини кузатишда давом этади.
Link роботи орбитага Northrop Grumman Pegasus XL ракетаси ёрдамида чиқди. Агар ҳамма иш кўнгилдагидек кечса, Swift сентябрь ойигача яна ишга қайтиши мумкин. Ҳозирча телескоп пастга тушишини секинлаштириш учун кузатувларни тўхтатиб турибди.
Телескоп айни пайтда Ердан 360 километр баландликда айланмоқда. Хавфсиз орбитага етиш учун уни яна 240 километр юқорига итариш керак. Link роботи эски телескопга зарар етказмаслик учун ўз двигательларини секин-аста ишга туширади.
Ушбу миссия бор-йўғи тўққиз ой ичида тайёрланди. Агар телескоп юқорига кўтарилмаса, у октябрь ойигача атмосферага кириб келиши кутилаётган эди. Бу вақтда эса уни қутқариш учун жуда кеч бўларди. НАСАнинг Hubble космик телескопи ҳам яқин йилларда шундай хавфга дуч келиши мумкин. Қуёш фаоллиги ошиши сабабли у ҳам баландлигини йўқотмоқда.
