Халқаро шахмат федерацияси (FIDE) 2026 йил 1 июль ҳолатига кўра блиц ва рапид йўналишлари бўйича дунёнинг энг кучли шахматчилари рейтингини янгилади. Эълон қилинган рейтингда ўзбекистонлик шахматчилар юқорилашга эришди.
FIDE тақдим этган блиц йўналиши рейтингида Ўзбекистоннинг иккинчи рақамли шахматчиси Нодирбек Абдусатторов ўз ҳисобига 35 рейтинг очкосини қўшиб қўйган ҳолда, бирданига 3 поғонага юқорилади ва 2820 очко билан жаҳон рейтингида 2-ўринга кўтарилди. Ушбу йўналишда амалдаги Жаҳон чемпиони Магнус Карлсен рейтингда бир оз очко йўқотганига қарамай (2860, -9), ҳамон пешқадамликни сақлаб турибди. Кучли учликни россиялик Даниил Дубов (2792) якунлаган.
Рапид йўналишида ҳам ўзбекистонлик гроссмейстер Жавоҳир Синдаров ўз рейтингини 3 поғонага яхшилаб, 2718 рейтинг очкоси билан жаҳон таснифида 10-ўринга кўтарилиб олди ва дунёнинг энг кучли тезкор шахматчилари қаторидан ўрин эгаллади. Бу таснифда ҳам пешқадамлик Норвегиялик Магнус Карлсенга (2803) тегишли бўлиб турибди. У ушбу ойда 29 рейтинг очкосини йўқотган ҳам ўз ўрнини сақлаб қолди. Иккинчи ўринни франциялик Алиреза Фирузжа (2748), учинчи ўринни эса ҳиндистонлик Аржун Эригаиси (2745) банд этган.
Классик шахмат йўналиши бўйича дунёнинг энг кучли 100 нафар шахматчиси рўйхатида Жавоҳир Синдаров 2777 рейтинг очкоси билан 4-ўринда бормоқда. Яна бир ўзбекистонлик гроссмейстер Нодирбек Абдусатторов эса 2766 очко билан 6-ўринни банд этиб турибди.
