Россия 1 июлдан бошлаб Финляндия, Эстония ва Латвия билан чегарадаги бир нечта темир йўл ўтказиш пунктларини вақтинча ёпди.
Ҳукумат фармойишига кўра, қуйидаги чегара пунктлари орқали “шахслар, транспорт воситалари, товарлар ва юклар ҳаракати” тўхтатилади:
- Ленинград вилоятидаги Виборг ва Светогорск (Финляндия билан чегара);
- Карелия республикасидаги Вярцил ва Люция (Финляндия билан чегара);
- Санкт-Петербург-Финляндия (Финляндия билан чегара);
- Псков вилоятидаги Печори-Псковские (Эстония билан чегара;
- Псков вилоятидаги Питалово (Латвия билан чегара).
Россия Ташқи ишлар вазирлиги Финляндия, Эстония ва Латвия расмийларини ушбу қарор ҳақида хабардор қилиши керак. Расмийлар нима сабабдан ушбу чегара пунктларини ёпишга қарор қилгани номаълум. Чекловлар қачонгача амал қилиши ошкор этилмаган.
Сўнгги икки йил давомида фақат Печори ва Питаловодаги ўтказиш пунктларигина фаолият кўрсатиб келган. Финландия билан чегара эса ушбу мамлакат расмийларининг қарорига кўра аллақачон ёпиб қўйилган.
Маълумот ўрнида, Россия тўртта давлатда элчихона очишни режалаштирмоқда. Гамбия, Либерия, Того ва Комор ороллари иттифоқида дипломатик ваколатхоналарни ишга тушириш кўзланган. Ҳозирги вақтда Африкада Россиянинг 45 та элчихонаси ишлаб турибди. Мамлакат ташқи ишлар вазири Сергей Лавров Москва ўз вақтида, аниқроғи Совет Иттифоқи парчаланган пайтда кескин камайиб кетган Африкадаги иштирокини тез фурсатда қайта тиклаётганини таъкидлади.
