Замонавий дизайнерлар ижодкорлик ва креативликда ҳеч қандай чегара билмайди ва бугунги кунда ҳеч кимнинг хаёлига келмас ғайриоддий мода намуналари билан барчани лол қолдиради. Қуйида сизга дунёдаги энг ноодатий кўринишда бўлган дизайнерлик пойабзаллар рўйхатини тақдим этамиз.
Пружинали пошна
Оff-White кийим-кечаклар ва пойабзаллар брендига тегишли мазкур оёқ кийимлар пошна қисми пружина шаклида ишланган. Уларнинг нархи 600 дан 1000 долларгачадир.
Бармоқли шиппаклар
Россиялик дизайнер Саша Канён Adidas Yeezy Slide шиппакларини бир дона бармоқ кўринишида ишлаб чиқди. Бундай оёқ киймни харид қилишнинг иложи йўқ, чунки шиппаклар биргина нусхада тайёрланган.
Теннис-ловер
Теннис ихлосмандлари учун ажойиб танлов! Бундай туфли актриса Зендея учун дизайнер Жонатан Андерсон томонидан махсус тайёрланди. Голливуднинг ёш юлдузи “Даъвогарлар” фильмига бағишланган оқшом дастурига Loewe компаниясига тегишли пошна қисми ҳақиқий теннис шаридан иборат пойабзалда ташриф буюрди.
Лак, совун, гул, шам ва тухумли пошна
Loewe брендига мансуб ғайритабиий кўринишдаги оёқ кийимларнинг яна бир қанча тури 2022-йилда тақдим этилган. Ажойиб пойабзаллар энг одатий предметлар — гул, тухум, совун, шам кабилар кўринишида ишланган. Бундай оёқ кийимлар нархи ўртача 1600 долларни ташкил этади.
Godzilla пойабзали
Япониялик дизайнер Матсуи Рёсуке “Godzilla: минус бир” фильмининг премераси учун лойиҳа иштирокчиларига Ҳазама деб номланган пойабзаллар коллекциясини яратди.
Мандаринли сандаллар
Италиянинг Canapes бренди ярим тозаланган мандарин шаклидаги пошнали сандалларнинг коллекциясини тақдим этди. Қўлда тайёрланган пойабзаллар серияси чекланган бўлиб, нархи 600 доллардан бошланади.
Пайпоқ-кроссовкалар
Balenciaga модалар уйи пайпоқ ва кроссовкани бирлаштирган ғаройиб пойабзални ишлаб чиқди. Унинг нархи 975 АҚШ долларидир.
Олтин бармоқлар
Schiaparelli бренди томонидан яратилган ва нархи 2000-5000 доллар бўлган мазкур оёқ кийим турли мавсумларга мўлжалланган.
