Португалиялик мутахассис Жозе Моуриньо Испаниянинг “Реал” клуби билан шартнома шартларини келишиб олди ва келаси мавсумдан жамоани бошқарадиган бўлди. Бу ҳақда таниқли инсайдер Фабрицио Романо ўзининг X (собиқ Twitter) саҳифасида хабар берди.
Манбага кўра, икки йилга мўлжалланган шартнома яқин кунларда расман имзоланади. Моуриньо Мадридга “Реал” жорий мавсумдаги сўнгги учрашувини ўтказадиган кун — 23 майдан кейин етиб келади.
Шу билан бирга, 63 ёшли мураббий фаолияти давомида иккинчи бор “қироллик клуби” устозига айланмоқда. У 2010—2013-йилларда ҳам жамоани бошқариб, Испания чемпионлиги, мамлакат Кубоги ва Суперкубогида бир мартадан зафар қучган.
Маълумот учун, португалиялик мутахассис 2025 йилнинг сентябридан буён “Бенфика”ни бошқариб келаётган эди. У профессионал фаолияти давомида Португалиянинг “Лейрия”, “Порту”, Англиянинг “Челси”, “Манчестер Юнайтед”, “Тоттенҳэм”, Италиянинг “Интер”, “Рома” ҳамда Туркиянинг “Фенербаҳче” клубларида ҳам мураббийлик қилган.
