Каталониянинг “Барселона” клуби Лондоннинг “Челси” жамоаси ўз ҳужумчиси Жоау Педруни сотмаслигини маълум қилганидан сўнг, трансферлар рўйхатида “ПСЖ” ҳужумчиси Гонсалу Рамуш асосий нишонга айланди. Бу ҳақда ТЕАМталк нашри хабар бермоқда.
Манба берган маълумотларга кўра, Франция клуби захира ўйинчиси мақомидан норози бўлаётган 24 ёшли футболчини қўйиб юборишга тайёр. Таъкидланишича, “Барселона” португалиялик ҳужумчини қўлга киритиш учун “Челси” билан рақобатлашиши мумкин.
Жорий мавсумда Рамуш барча турнирларда 41 та ўйинда иштирок этиб, 12 та гол ва иккита голли узатмани амалга оширди. Футболчининг клуб билан амалдаги меҳнат шартномаси 2028 йилнинг ёзига қадар мўлжалланган. Transfermarkt портали маълумотларига кўра, футболчининг бозор қиймати 35 миллион еврони ташкил этади.
Маълумот учун, “Кўк-анорранглилар”нинг 37 ёшли ҳужумчиси Роберт Левандовски ва Туриннинг “Ювентус” клуби шахсий шартнома шартларини тўлиқ келишиб олгани, келишув бир йилга мўлжалланган бўлиб, футболчининг йиллик маоши турли бонусларни ҳисобга олмаганда, тахминан 6 миллион еврони ташкил қилиши хабар берилган эди.
Левандовски 2022 йилдан бери “Барселона” шарафини ҳимоя қилиб келади. У ҳозирга қадар каталонияликлар таркибида 189 та ўйинда майдонга тушиб, ўз ҳисобига 119 та гол ва 24 та голли узатма ёздириб қўйган.
