АҚШ, Канада ва Мексика майдонларида бўлиб ўтадиган Жаҳон чемпионатида футболчиларнинг ўйинларни ўтказиб юбориш эҳтимолини камайтириш мақсадида янги тартиб жорий этилиши кутилмоқда. Бу ҳақда The Athletic хабар берди.
Янги қоидаларга кўра, тўпланган сариқ карточкалар нафақат чорак финалдан кейин, балки гуруҳ босқичи якунлангач ҳам бекор қилиниши режалаштирилмоқда. Ушбу ўзгариш 28 апрель, сешанба куни Ванкуверда бўлиб ўтадиган FIFA кенгашининг йиғилишида муҳокама қилинади ва тасдиқланади.
Аввалги Жаҳон чемпионатларида сариқ карточкалар фақатгина чорак финал босқичидан сўнг “куйиб кетар” эди. Бу финал ўйинини асосий футболчилар дисквалификация туфайли ўтказиб юбормаслиги учун қилинган эди.
Бироқ 2026-йилдан бошлаб турнирда иштирокчилар сони 32 тадан 48 тага кўпайгани ва ўйинлар сони ортгани сабабли, FIFA футболчиларнинг кўп огоҳлантириш олиши натижасида плей-офф баҳсларини ўтказиб юбориш хавфини камайтиришни мақсад қилган.
Эслатиб ўтамиз, аввалроқ FIFA Жаҳон чемпионатида иштирок этадиган терма жамоалар мукофот пулларини оширишга қарор қилгани ҳақида хабар берилган эди. Унга кўра, бир қатор миллий федерациялар, хусусан, Англия футбол ассоциацияси FIFA’га мурожаат қилиб, Шимолий Америкадаги турнир улар учун иқтисодий зарар келтириши мумкинлигидан хавотир билдирган
Маълумот учун, 2026-йилги жаҳон чемпионати АҚШ, Канада ва Мексика мамлакатларида бўлиб ўтади. Мусобақанинг ҳал қилувчи баҳслари 11 июлдан 19 июлга қадар ўтказилиши белгиланган.
