Sportico портали 2026 йил ҳолатига кўра дунёнинг энг қиммат футбол клублари рейтингини янгилади. Рўйхат клубларнинг молиявий ҳисоботлари, “Football Money League” таҳлиллари ҳамда ихтисослашган мутахассислар тақдим этган рақамлар асосида тузиб чиқилди.
Клубларнинг даромадлари учта асосий йўналиш бўйича баҳоланди:
- Телеҳуқуқлар сотуви;
- Тижорий фаолият (ҳомийлик шартномалари);
- “Матчдай” (ўйин кунидаги чипталар ва хизматлар савдоси).
Мадриднинг “Реал” клуби 7,7 миллиард долларлик кўрсаткич билан рейтинг пешқадамига айланди. Шунингдек, кучли учликдан Каталониянинг “Барселона” (6,65 млрд доллар) ҳамда Англиянинг “Манчестер Юнайтед” (6,47 млрд доллар) клублари жой олди.
Эътиборли жиҳати, кучли ўнликнинг нақ олтита поғонаси Англия Премьер Лигаси вакиллари томонидан банд этилди. АҚШнинг MLS лигаси эса топ-50 рўйхатида энг кўп жамоаси бор лига бўлган бўлса-да, уларнинг бирортаси кучли ўнликка кира олмади.
2026-йилнинг энг қиммат 10 та клуби:
- “Реал Мадрид” — 7,7 млрд доллар;
- “Барселона” — 6,65 млрд доллар;
- “Манчестер Юнайтед” — 6,47 млрд доллар;
- “Бавария” — 5,78 млрд доллар;
- “Ливерпуль” — 5,74 млрд доллар;
- “Манчестер Сити” — 5,7 млрд доллар;
- “Арсенал” — 5,43 млрд доллар;
- “ПСЖ” — 5 млрд доллар;
- “Челси” — 4 млрд доллар;
- “Тоттенҳэм” — 3,5 млрд доллар.
