АҚШ президенти Дональд Трамп ва унинг маъмурияти аъзолари бўлган меҳмонхонада номаълум шахс ўт очди. Бу ҳақда BBC хабар берди.
Ҳодиса 25 апрель куни Washington Hilton меҳмонхонасида бўлиб ўтган Оқ уй мухбирлари ассоциациясининг йиллик кечки зиёфатида юз берди. Оқибатда АҚШ Махфий хизмати ва бошқа хавфсизлик органлари Трампнинг нутқини кутаётган юздан ортиқ одам ўтирган меҳмонхонанинг зиёфат залини қуршаб олди.
Баъзи иштирокчилар бешдан саккизтагача ўқ овозини эшитганини айтмоқда. Қуролланган шахснинг ўзи залга кирмаган, воқеа меҳмонхонанинг бошқа хоналаридан бирида содир бўлган.
Тадбирда Трампдан ташқари унинг рафиқаси Мелания Трамп, вице-президент Жей Ди Венс, мудофаа вазири Пит Ҳегсет ва давлат котиби Марко Рубио ҳам иштирок этаётганди. Улар ва тадбирга таклиф қилинган бошқа журналистлар ҳам эвакуация қилинган. Меҳмонхонада хавфсизлик чоралари кучайтирилган.
Трамп: Ўт очган шахс ушланди
Оқ уй матбуот хизмати гумонланувчи қўлга олганини маълум қилди. Эркакнинг ушланганини АҚШ президенти ҳам тасдиқлади.
“Вашингтонда Колумбия округида сермазмун оқшом бўлди. Махфий хизмат ва ҳуқуқни муҳофаза қилувчи органлар аъло даражада иш олиб борди. Улар тез ва жасорат билан ҳаракат қилди. Ўт очган шахс қўлга олинди, мен эса ‘шоуни давом эттиришъни тавсия қилдим, бироқ тўлиқ ҳуқуқни муҳофаза қилувчи органлар тавсияларига амал қиламан”, деди президент.
Трампнинг айтишича, ҳодиса сабаб журналистлар билан учрашувни бошқа вақтга кўчиришга қарор қилинган.
