Исроил бош вазири Биньямин Нетаньяхунинг идораси унинг саломатлиги ҳолати тўғрисидаги йиллик ҳисоботни эълон қилди. Унда айтилишича, текширувлардан бирида унинг простата безида кичик хавфли ўсма аниқланган ва у илк босқичдаёқ бартараф этилган.
Нетаньяху ушбу ҳисоботга изоҳ берар экан, Эрон билан ҳарбий қарама-қаршилик авж палласига чиққан пайтда ошкор бўлмаслиги учун унинг эълон қилинишини икки ойга кечиктиришни сўраганини таъкидлаган. У 2024 йил охирида простата безининг хавфсиз катталашувини даволаш учун жарроҳлик амалиётини ўтказганини ва шундан сўнг доимий шифокорлар назоратида бўлганини билдирган.
“Сўнгги текширув вақтида простата безида ҳажми бир сантиметрдан кичикроқ бўлган майда доғ топилди. Текширув бунинг ҳеч қандай тарқалиш ёки метастазларсиз, хавфли ўсманинг жуда эрта босқичи эканини кўрсатди”, деб ёзди у X ижтимоий тармоғида.
Нетаньяхунинг сўзларига кўра, шифокорлар бу унинг ёши учун нормал ҳолат эканини ва унинг олдида иккита йўл борлигини айтган: кузатувда қолиш ёки дарҳол даволаниб, муаммони бартараф этиш.
“Мени яхши биласиз. Эҳтимолий хавф ҳақида менга ўз вақтида хабар беришса, мен уни зудлик билан бартараф этишни истайман. Бу ҳам миллий, ҳам шахсий даражада шундай. Мен айнан шундай йўл тутдим. Мен муаммони изсиз йўқ қилган мақсадли даволаниш курсини олдим. Бир нечта қисқа муолажаларга қатнаб, китоб ўқидим ва ишимни давом эттирдим. Доғ бутунлай йўқолди”, деди Исроил бош вазири.
2024 йил охирида Associated Press агентлиги Нетаньяхунинг простата бези бўйича операцияни муваффақиятли ўтказгани ҳақида хабар берган эди. Ўшанда агентлик Исроил бош вазири соғлиғида ҳеч қандай муаммоси йўқ инсон образини яратиб келгани, бироқ сўнгги йилларда мамлакатдаги инқирозли вазиятларни инобатга олганда, ўзини яхши жисмоний ҳолатда сақлаш унга тобора қийинлашиб бораётганини ёзган эди.
