Туркиядан Украина президенти Владимир Зеленский ва Россия раҳбари Владимир Путин учрашувини ташкиллаштириш сўралди. Бу ҳақда Украина ташқи ишла вазири Андрей Сибига маълум қилди.
Маълум қилинишича, Украина Эрондаги уруш фонида тўхтаб қолган музокараларни тиклашга уринмоқда.
“Биз бу ҳақда Туркиядан сўрадик, бошқа айрим давлатларга ҳам мурожаат қилдик”, деди Сибига.
Унинг сўзларига кўра, Украина президенти Беларусь ёки Россиядан бошқа ҳар қандай ҳудудда Путин билан учрашишга тайёр. Зеленский тўрт йилдан ортиқ давом этаётган урушга ечим топишни тезлаштиришга анча вақтдан бери уриниб келмоқда.
Беларусь Россиянинг яқин иттифоқчиси бўлиб, 2022 йилда Москванинг Украинага қарши кенг кўламли босқинида ўз ҳудудидан фойдаланишга имкон берган. Шу сабабли Зеленский у ерда музокара ўтказишга қарши чиққан. Сибига Анқаранинг таклифга қандай муносабат билдирганини очиқламади.
“Биз айнан туркларга мурожаат қилдик. Аммо Москва ва Беларусьдан ташқари бошқа бир пойтахт шундай учрашув ташкил қилса, биз борамиз”, деди у.
Кремль аввалроқ Зеленскийни учрашув учун Москвада қабул қилишга тайёрлигини билдирган эди. Путин ушбу таклифни Хитойда ўтказилган ҳарбий парадда маълум қилган. Бироқ Украина президенти у ерга бормаслигини айтиб, учрашувни Киевда ўтказишни таклиф қилган.
2025 йил август ойида АҚШ президенти Дональд Трамп Аляскада Путин билан учрашганидан бери Украинага ҳудудий ён босиш ғоясини илгари суриб келмоқда. У украин ҳарбийларининг Донбассдан чиқиб кетишини қўллаб-қувватлаган ва ҳудудий йўқотишларсиз уруш тугамаслигини айтиб ўтган.
Февраль охирида Россия ва Украина ўртасида ҳудудий масалалар бўйича музокаралар тўхтаб қолди. Айнан шу вақтда Эрон билан боғлиқ можаро АҚШ музокарачилари эътиборини чалғитди. Россия ташқи ишлар вазири Сергей Лавров эса Москва фақат Донбасс устидан тўлиқ ҳуқуқий назоратни қабул қилишини айтди. Зеленский эса тинчлик эвазига ҳудудий ён босиш эҳтимолини рад этиб, буни “катта хато” деб атаган.
