Германиянинг “Штутгарт” клуби бош мураббийи Себастьян Хёнесс жорий мавсум якунлангач, “Реал Мадрид” бошқарувига келиши мумкин. Бу ҳақда Билд нашри хабар берди.
“Реал” янги мураббий қидирмоқда, чунки жамоанинг Чемпионлар Лигасидан чиқиб кетиши ва чемпионатда “Барселона”дан ортда қолаётгани клуб раҳбариятига маъқул келмаган. Хабар қилинишича, айнан германиялик мутахассис ушбу лавозим учун асосий номзодлардан бирига айланган. Унинг ўйин услуби ва “Штутгарт”нинг кўплаб ўйинчилари сотиб юборилганига қарамай эришаётган муваффақиятлари “қаймоқранглилар” раҳбариятида катта таассурот қолдирган.
Мутахассиснинг Германия клуби билан амалдаги шартномаси 2028 йилнинг 30 июнига қадар мўлжалланган.
Маълумот учун, Хёнесс “Штутгарт”ни 2023 йилдан буён бошқариб келмоқда. Унинг қўл остида клуб 2024/2025 йилги мавсумда Германия Кубогини қўлга киритди.
Жамоа жорий мавсум Германия Бундеслигасида 56 очко жамғарган ҳолда, “Бавария”, “Боруссия Дортмунд” ва “Лейпциг”дан сўнг 4-ўринни эгаллаб турибди.
“Реал” айни вақтда 73 очко билан Ла Лига турнир жадвалида иккинчи ўринда бормоқда. “Қироллик клуби” асосий рақобатчиси “Барселона”дан 6 очкога ортда қолмоқда. Бироқ “кўк-анорранглилар” Мадрид клубидан бир ўйин кам ўтказган.
“Қироллик клуби” Европа Чемпионлар Лигасини ҳам эрта тарк этди. Жамоа мусобақанинг чорак финал босқичида Мюнхеннинг “Бавария” клубига (умумий 4:6 ҳисобида) имкониятни бой бериб, турнир билан хайрлашди.
Аввалроқ, амалдаги бош мураббий Альваро Арбелоанинг келажаги борасида Ла Лига якунлангач бир қарорга келиниши маълум қилинган эди. Мураббийнинг ишига клуб раҳбарияти томонидан берилган умумий баҳо ижобий. Бунга сабаб сифатида ҳал қилувчи паллалардаги жароҳатларнинг кўплиги (ЕЧЛ нимчорак финалида “Манчестер Сити”га қарши ўйин олдидан 7 нафар футболчи жароҳат олган) кўрсатилмоқда.
Бироқ, “Реал Мадрид” мураббийлари учун асосий ўлчов бирлиги титуллар ҳисобланади. Испания Кубоги ва Чемпионлар Лигаси бой берилди (Испания Суперкубоги эса Хаби Алонсо ҳисобига ёзилган). Энди фақат Ла Лигадаги “мўъжиза” вазиятни қутқариб қолиши мумкин. Шунинг учун клуб муқобил вариантларни кўриб чиқмоқда, аммо улар орасида Юрген Клопп (мухлислар танлови) ёки Дидье Дешам каби номлар мавжуд эмас.
