Испания Олий суди бразилиялик ҳужумчи Неймарнинг “Сантос”дан “Барселона”га ўтиши бўйича кўп йиллик суд жараёнига нуқта қўйди. Суд футболчи, шунингдек, клубнинг собиқ президентлари Сандро Росел ва Хосеп Мария Бартомеуга нисбатан коррупция ва фирбгарлик айбловлари бўйича чиқарилган оқлов ҳукмини ўз кучида қолдирди.
Олий суднинг Жиноий палатаси DIS инвестиция компанияси томонидан берилган апелляция шикоятини рад этди. Суд қарорида қайд этилишича, трансфер жараёнида жиноят таркиби аниқланмаган ва айбловлар асоссиз деб топилган.
Неймарнинг ҳуқуқларига эгалик қилган Бразилиянинг DIS компанияси трансфер суммасининг 40 фоизига даъвогарлик қилган эди. Компания вакилларининг таъкидлашича, келишувнинг асосий қисми яширилган, натижада улар белгиланганидан камроқ маблағ олишган.
Маълумот учун, 2013-йилда “Барселона” Неймарни “Сантос”дан сотиб олган. Хужжатларда трансфернинг расмий қиймати 57,1 миллион евро этиб кўрсатилган (шундан 17,1 миллиони “Сантос” клубига, 40 миллиони эса футболчининг ота-онасига тегишли компанияга ўтказилган). Бироқ бразилиялик инвесторлар аслида келишув суммаси 83 миллион евродан ошганини даъво қилиб, судга мурожаат қилган эди. Ушбу иш бўйича суд жараёнлари 2016-йилдан буён давом этиб келаётган эди. 2022 йил декабрида Испания Миллий суди барча айбланувчиларни оқлаган, Олий суднинг ҳозирги қарори эса ушбу низоларга якуний ҳуқуқий баҳони берди.
