Мадриднинг “Реал” клуби собиқ мураббийи, ҳозирда Португалиянинг “Бенфика” жамоасини бошқараётган Жозе Моуриньони ортга қайтариш вариантини кўриб чиқмоқда. Бу ҳақда Испаниянинг Mundo Deportivo нашри хабар берди.
Манбанинг маълум қилишича, “қироллик клуби” мутахассисни қайтариш масаласини ўрганиб чиққан ва ҳатто у билан алоқа ҳам ўрнатган. Бироқ ҳозирча томонлар ўртасида аниқ ва расмий музокаралар олиб борилаётгани йўқ. Моуриньонинг ўзи эса Мадриддан тушадиган ҳар қандай таклифни кўриб чиқишга тайёр ва мулоқот учун очиқ эканини билдирган.
Шунга қарамай, Моуриньо номзоди борасида “Реал” раҳбарияти ичида якдиллик мавжуд эмас. Клубдаги баъзи масъуллар португалиялик мураббийнинг қайтишини қўллаб-қувватламоқда. Бошқа манбалар эса Моуриньонинг иккинчи марта “Сантяго Бернабеу”га келиш эҳтимолини мутлақо инкор этмоқда.
Эслатиб ўтамиз, Жозе Моуриньо 2010—2013-йиллар давомида “Реал Мадрид”ни бошқарган ва жамоа билан Испания чемпионлиги, Кубоги ҳамда Суперкубогини қўлга киритган. Унинг давридаги “Эл-Класико”лар футбол тарихидаги энг муросасиз ўйинлар сифатида ёдда қолган.
