Ливан ва Исроил сўнгги 30 йилдан ортиқ вақт ичида илк бор дипломатик музокаралар ўтказди. Музокараларда воситачилик қилган АҚШ давлат котиби Марко Рубио буни “Ҳизбуллоҳ” таъсирини тугатиш учун “тарихий имконият” деб атади. Бу ҳақда BBC хабар берди.
Исроил музокараларда “Ҳизбуллоҳ”га ишора қилиб, барча нодавлат қуролли гуруҳларни қуролсизлантиришни талаб қилди. Ливан эса ўт очишни тўхтатиш ва гуманитар инқирозни енгиллаштириш чораларини кўришга чақирди. Икки давлат ўртасида дипломатик муносабатлар ўрнатилмаган, охирги юқори даражадаги тўғридан тўғри музокаралар эса 1993-йилда бўлиб ўтган.
Исроилнинг 2 мартдан буён Ливанга берган зарбалари оқибатида 2 мингдан ортиқ одам ҳалок бўлди. Исроил бу амалиётлар “Ҳизбуллоҳ”ни қуролсизлантириш ва йўқ қилишга қаратилганини таъкидламоқда.
АҚШ давлат департаменти матбуот котиби Томми Пиготт музокаралардан сўнг Исроил ва Ливан “Ҳизбуллоҳ” таъсирини камайтириш устида ишлашга келишиб олганини айтди.
“Ливан томони ўт очишни тўхтатиш, оғир гуманитар инқирозни ҳал этиш ва юмшатиш учун аниқ чоралар кўришга чақирди”, деди у.
АҚШ музокараларда Исроилнинг ўзини ҳимоя қилиш ҳуқуқини қўллаб-қувватлашини билдирган. Музокаралардан олдин журналистлар билан суҳбатда Рубио бу учрашувни “жараён” деб атаган.
“Бу вақт талаб қилади, лекин биз буни ҳаракатга арзийди деб ҳисоблаймиз. Бу келажакда давом эттириладиган тарихий учрашув”, деди у.
Ливан президенти Жозеф Аун можаронинг “ягона ечими” ҳудуд хавфсизлиги учун фақат Ливан қуролли кучлари масъул бўлиши эканини таъкидлади. Бироқ у ҳукуматнинг “Ҳизбуллоҳ”га қарши туриш имкониятлари чекланганини билдирди.
Музокаралар арафасида “Ҳизбуллоҳ”нинг юқори мартабали аъзоларидан бири Associated Press агентлигига берган интервьюсида улар Вашингтонда эришилган келишувларга амал қилмаслигини айтди.
“Биз улар келишган нарсаларга алоқадор эмасмиз”, деди “Ҳизбуллоҳ” сиёсий кенгаши аъзоси Вафиқ Сафа.
1982-йилда ташкил этилган “Ҳизбуллоҳ” қуролланган гуруҳ бўлиб, Ливаннинг асосан шиа аҳолиси яшайдиган жанубий ҳудудларида ва пойтахт Байрутнинг жанубий туманларида катта таъсирга эга. Гуруҳга алоқадор сиёсатчилар ҳукуматда ҳам икки вазирлик лавозимини эгаллаб турибди.
