Россиянинг ракета-космик соҳаси етакчиси, “НПО машиностроения” ҳарбий-саноат корпорацияси раҳбари ва бош конструктори Александр Леонов 75 ёшида вафот этди. Бу ҳақда “Интерфакс” хабар берди.
Олимнинг ўлими сабаби маълум қилинмаган. Александр Леонов 2007 йилдан буён Россиянинг энг муҳим мудофаа корхоналаридан бири — Реутов шаҳрида жойлашган “НПО машиностроения”ни бошқариб келган. Унинг раҳбарлиги ва бевосита иштирокида “Циркон” гипертовушли кемага қарши ракетаси ва “Авангард” қитъалараро баллистик ракеталари учун жанговар жиҳозлар ишлаб чиқилган.
Бундан ташқари, Леонов “Гранит”, “Вулқон” ва “Бастион” комплекслари учун товушдан тез учувчи ракета ишлаб чиқарилишида иштирок этган.
Январь ойи охирида Леонов 2025 йил якуни бўйича “Циркон”лар ишлаб чиқариш ҳажми кескин ошиши ҳақида ҳисобот берганди. 2024 йилда президент Владимир Путин “Циркон” Украинага зарба бериш учун қўлланганини айтган. У мазкур ракета “дунёнинг ҳеч бир давлатида ўхшаши йўқ”лигини таъкидлаган. “Циркон” 9 Мах (товуш тезлигидан 9 баравар юқори) тезликка эриша олади ва 1000 километргача бўлган масофадаги нишонларга зарба бера олади.
Леонов техника фанлари доктори, профессор бўлиб, узоқ йиллар давомида Бауман номидаги Москва давлат техника университетининг “Аэрокосмик тизимлар” кафедрасини бошқарган. У “Меҳнат қаҳрамони” ва Россияда хизмат кўрсатган машинасоз унвонларига эга.
“Циркон” ракетасини ишлаб чиқиш 2011 йилда бошланган, синовлар 2016 йилда старт олган. 2022 йил август ойида Мудофаа вазирлиги серияли ишлаб чиқариш бошланганини эълон қилди. Ракета кемалардан учирилади ва қирғоқ учириш мосламаларига мослаштирилиши мумкин.
Россияда гипертовуш технологиялари устида ишлаган айрим олимлар “давлатга хиёнат” айблови билан жиноий жавобгарликка тортилган. Хусусан, Россия Фанлар академиясининг Сибир бўлими институтларида ишлаган Анатолий Маслов, Александр Шиплюк, Дмитрий Колкер, Валерий Звегинцев ва Владислав Галкин устидан иш очилган. Уларнинг баъзиларига Хитойга махфий маълумот узатганлик айби қўйилган. Дмитрий Колкер оғир касал ҳолатда ҳибсга олинган, у уч кун ўтиб вафот этган. Шиплюк 15 йилга, Маслов эса 14 йилга қамалган.
