АҚШ президенти Дональд Трампнинг халқ орасидаги қўллаб-қувватлаш кўрсаткичи Оқ уйга қайтганидан бери энг паст нуқтага — 36 фоизга тушиб кетди. Бу ҳақда Reuters/Ipsos ўтказган янги ижтимоий сўровнома натижаларидан маълум бўлди.
Ўтган ҳафтада 40 фоизни ташкил этган рейтингнинг кескин тушишига ёнилғи нархининг кўтарилиши ва яшаш таннархининг ошиши асосий сабаб сифатида кўрсатилмоқда. Респондентларнинг атиги 25 фоизи Трампнинг нарх-навони жиловлаш борасидаги ҳаракатларини маъқуллаган. Ваҳоланки, бу масала унинг 2024-йилги сайловолди кампаниясининг марказида эди.
Америкаликларнинг фақатгина 29 фоизи президентнинг иқтисодий сиёсатига ишонч билдирмоқда. Бу кўрсаткич нафақат Трампнинг биринчи президентлик давридан, балки унинг ўтмишдоши Жо Байденнинг энг паст рейтингидан ҳам пастроқдир.
“Аҳмоқона урушлар” ва Эрон
Сайловолди ваъдаларида “аҳмоқона урушлар”га чек қўйишни ваъда қилган Трамп бугун ўзи бошлаган Эрон уруши сабабли танқидлар остида қолмоқда. АҚШнинг Эронга зарбаларини америкаликларнинг атиги 35 фоизи қўллаб-қувватламоқда. Сўровда қатнашганларнинг 61 фоизи бу урушга қарши чиқди.
Респондентларнинг 46 фоизи мазкур уруш узоқ истиқболда АҚШни хавфли мамлакатга айлантиришига ишонади.
Бензин нархи
Ўтган ойда, 28 февраль куни АҚШ ва Исроилнинг Эронга координациялашган ҳужумларидан сўнг, Америкада бензиннинг ўртача нархи бир галлон ( 3,7 литр) учун қарийб 1 долларга қимматлашди. Яқин Шарқдан нефть етказиб беришнинг чеклангани бутун иқтисодиётга зарба бермоқда. Ҳозирда америкаликларнинг 63 фоизи мамлакат иқтисодиётини кучсиз деб ҳисобламоқда.
Трамп ўз партияси ичида ҳамон кучли мавқега эга бўлса-да, республикачилар орасида ҳам норозилик учқунлари кўринмоқда. Партиядошларининг 34 фоизи (ўтган ҳафтада 27 фоиз эди) президентнинг яшаш таннархи билан боғлиқ сиёсатидан норози эканини билдирган.
Демократлар таҳлилчилари мазкур вазиятни ноябрда бўлиб ўтадиган оралиқ сайловлар учун улкан имконият деб баҳоламоқда. Уларнинг фикрича, миллий хавфсизлик ва иқтисодиёт каби анъанавий республикачилар мавзулари энди демократлар учун асосий қуролга айланиши мумкин.
