Бугунги кунда бюти-бренднинг муваффақияти номига эмас, балки унинг ортида турган ғояга боғлиқ. Бири рангларнинг кенг танловига пул тикиб, соҳа стандартларини ўзгартирса, бошқаси ижтимоий тармоқлардаги визуал ва трендларга, яна бири эса қадриятлар ҳамда фойдаланишдаги қулайликка эътибор қаратади.
Риҳанна
2017 йилда Rihanna LVMH ҳолдинги билан ҳамкорликда Fenty Beauty брендини ишга тушириб, гўзаллик саноатида йиллардан бери муҳокама қилиниб келган муаммога дарҳол ечим топди. Оммавий ва люкс сегментда тўқ рангли тери ва ўзига хос тери турлари учун тонал кремлар деярли йўқ эди — аксарияти ё кулранг тус берар, ё терида ғалати кўринарди. Fenty’нинг илк тўпламида 40 га яқин тус чиқарилди ва уларнинг аксарияти айнан тўқроқ ва ностандарт тери рангларига мўлжалланган эди.
Риҳанна брендга шунчаки ўз номини бериб қолмай, маҳсулотларни яратиш жараёнида ҳам бевосита иштирок этди. Дастлабки йилнинг ўзидаёқ бренд 500 миллион доллардан ортиқ даромад келтирди, хонанданинг ўзи эса соҳанинг энг нуфузли тадбиркорлари рўйхатидан жой олди. Кейинчалик тўпламдаги ранглар сони 50 тага етказилди ва бу ёндашувни люксдан тортиб оммавий маркетгача бўлган бошқа брендлар ҳам қўллай бошлади.
Шунингдек, илгари йирик брендларда камдан-кам учрайдиган лаб бўёқлари ҳам кўпчиликнинг эътиборини қозонди. Натижада Fenty Beauty шунчаки муваффақиятли лойиҳа бўлиб қолмай, биргина ғоя бутун бир бозордаги қоидаларни қандай ўзгартириши мумкинлигига яққол мисол бўлди.
Ҳейли Бибер
Ҳейли Бибер 2022 йилда тери парваришига ихтисослашган Rhode брендига асос солди. Бренд концепцияси “glazed skin” (сирланган тери) эффектига асосланган: бунда тери худди юпқа сир қатлами билан қоплангандек намланган, силлиқ ва табиий жилоланиб туради. Бу ижтимоий тармоқларда тезда оммалашди ва блогерлар ҳамда бошқа брендлар тақлид қила бошлаган алоҳида трендга айланди.
Бренднинг маҳсулотлар қатори дастлаб бир нечта асосий воситалардан — зардоб, крем ва лаб учун балзамдан иборат эди. Асосий урғу кундалик парвариш учун универсал маҳсулотларга қаратилганди. Шу туфайли бренд тезда юксалди: Rhode’нинг бир йиллик даромади 212 миллион долларга етди.
2025 йилда Ҳейли брендни e.l.f. Beauty компаниясига 1 миллиард долларга сотди. У бу сумманинг 800 миллион долларини дарҳол (нақд пул ва акциялар кўринишида) олди, қолган 200 миллион доллари эса келгуси йиллардаги савдо ўсишига боғлаб қўйилди. Шу билан бирга, Бибер лойиҳада креатив директор сифатида қолди, бу эса бренднинг шунчаки юлдузли лойиҳа эмас, балки йирик бизнес сифатида ривожланишда давом этаётганини кўрсатади.
Селена Гомес
Селена Гомес 2020-йилда Rare Beauty брендига асос солиб, дарҳол ўз йўналишини белгилаб олди: ортиқча қатламларсиз ва мураккаб услубларсиз макияж. Маҳсулотлар қаторидан енгил тонал воситалар, кремсимон ёғупалар ҳамда осон суртиладиган пардоз маҳсулотлари ўрин олди. Шу сабабли бренд кенг омма, жумладан, ҳар куни пардоз қилмайдиганларнинг ҳам меҳрини қозонди.
Қадоқнинг қулайлигига алоҳида урғу берилган. Масалан, идишлар катталаштирилган аппликаторларга ва қўлда ушлашга осон бўлган қопқоқларга эга. Селенанинг айтишича, у буни яратишда моторикаси ўзгача бўлган одамларни ҳам ҳисобга олган ва айнан шу жиҳат брендни бошқа янги лойиҳалардан ажратиб турган.
Rare Beauty тез орада энг кўп муҳокама қилинадиган гўзаллик лойиҳаларидан бирига айланди: бренд баҳоси 2 миллиард долларга етди, маҳсулотларнинг ўзи эса доимий равишда бесцеллерлар рўйхатидан тушмай келади.
